Ndërsa hetuesit kanë nisur punën për zbardhjen e plotë të motiveve të vetëvrasjes së studentes 20-vjeçare, vajza me emrin “Xhoi”, e cila me refuzimin e dashurisë së saj ishte “shkaktarja” e ngjarjes së rëndë, nuk është identifikuar ende. Për grupin hetimor, kjo vajzë mbetet mister, për aq kohë sa edhe shoqet e viktimës, me të cilat ajo ndante qiranë e shtëpisë në Tiranë, nuk e njihnin dhe nuk e kishin dëgjuar ndonjëherë emrin e saj.
Tri vajzat, bashkëmoshatare të Ida Xherahut, po ashtu studente tek Inxhinieria e Ndërtimit, janë shoqëruar dje për t’u marrë në pyetje nga grupi hetimor. Nga dëshmia e tyre nuk është zbuluar asgjë në lidhje me identitetin e vajzës, që duket se është bërë shkak për vetëvrasjen e studentes.
Burime nga Policia thanë se asnjëra prej tri vajzave të pyetura nuk kishte dijeni për lidhjen, apo dashurinë e fshehtë të shoqes së tyre për një femër tjetër.
Madje, ato kanë pohuar para oficerëve të Policisë se Ida u kishte folur asaj për një lidhje që kishte me një djalë, të cilin nuk e kishin takuar asnjëherë. Vajzat kanë deklaruar se shoqja e tyre ishte shumë e qetë, e dashur dhe që nuk u kishte lënë asnjëherë të dyshonin se ajo mund të kryente një veprim të tillë.
“Ne e dinim që ajo kishte një lidhje dashurie, por me një djalë. Nuk e kishim idenë që ajo mund të pëlqente femrat, të paktën jo në këtë formë”, janë shprehur vajzat.
Ndërsa kanë shtuar se pavarësisht se ajo u kishte thënë se dilte me një djalë, të cilin e kishte të dashur, asnjëherë nuk u kishte folur për të dhe nuk ua kishte thënë as emrin e tij.
“Nuk e dimë emrin e djalit që ajo thoshte se e kishte të dashur. Nuk na e kishte thënë, madje as nuk na e kishte prezantuar, siç na ndodh ne të tjerave që të takohemi ndonjëherë edhe si çifte. Por që të dashuronte një vajzë, këtë nuk e kishim menduar asnjëherë dhe as nuk na e kishte lënë të dyshonim për këtë”, kanë deklaruar tri shoqet e viktimë, të cilat pas deklarimeve janë lënë të lira.
Vetëvrasja e studentes, enigmë vajza me emrin “Xhoi” që “i theu zemrën” 20-vjeçares
