Presidenti Nishani takoi sot Sekretarin francez të Shtetit për çështjet Europiane, Harlem Desir. Gjatë takimit, duke vendosur theksin tek integrimi europian i Shqipërisë, Presidenti Nishani shprehu falenderimet për mbështetjen që Franca dhe presidenti Hollande i dhanë Shqipërisë për marrjen e statusit të Vendit Kandidat për në BE.
Gjithashtu, gjatë takimit Presidenti Nishani theksoi rëndësinë e kryerjes së reformave institucionale në forcimin dhe ruajtjen e shtetit ligjor. Nga ana e tij, Sekretari francez i Shtetit për çështjet Europiane vlerësoi progresin e deritanishëm të Shqipërisë, por theksoi edhe nevojën për të demonstruar përparim në reformat e fushës së drejtësisë dhe luftën kundër krimit të organizuar dhe korrupsionit.
Përsa i përket bashkëpunimit ekonomik, Presidenti i Republikës tha se pavarësisht se në marrëdhëniet dypalëshe në këtë fushë ka patur histori suksesi, ato janë ende shumë larg potencialeve dhe burimeve reale që ekzistojnë.
Të dy bashkëbiseduesit u ndalën në zhvillimet e rajonit të Ballkanit Perëndimor, ku Presidenti Nishani kërkoi mbështetjen nga BE për projektet rajonale zhvillimore, për të cilat, z. Desir vlerësoi se duhen shfrytëzuar të gjitha mundësitë e ofruara nga konferenca e Berlinit. Në vijimësi të konferencës së Berlinit, z. Desir konfirmoi zhvillimin e një konference të ngjashme vitin e ardhshëm për çështjet e zhvillimit dhe financimit të projekteve zhvillimore të rajonit të Ballkanit Perëndimor.
