Ka nisur sot në Gjykatën e Shkallës së Parë të Krimeve të Rënda, gjyqi ndaj shtetasit kolumbian, Cesar Augusto Pelaez Triana i cili akuzohet se pasur detyrë të merrte paratë nga pritësit e sasisë prej rreth 256 kg kokainë, e cila u zbulua nga autoritetet e Malit të Zi një vit më parë në ngarkesën e bananeve, në një anije tregtare dhe që dyshohej se kishte destinacion Shqipërinë.
Kreu i trupës gjykuese Sandër Simoni për shkak të sekretit hetimorë dhe kërkesës së prokurores Elisabeta Imeraj vendosi që procesi ndaj Kolumbianit të zhvillohet nga sot pa praninë e kamerave.
Prokuroria për Krime të Rënda e akuzon për veprën penale të “trafikut të lëndëve narkotike”, mbetur në tentativë.
Shtetasi me origjine kolumbiane dhe me shtetësi spanjolle është arrestuar në Shqipëri në datë 10. 06. 2014, pas një koordinimi të autoriteteve shqiptare me ato malazeze.
“Ky person akuzohet nga Prokuroria se ka pasur si detyrë të merrte paratë nga pritësit e një sasie prej rreth 256 kg kokainë, e cila u zbulua nga autoritetet e Malit të Zi në një anije tregtare dhe që dyshohet se kishte destinacion Shqipërinë”, thuhet në akuzën e Prokurorisë së Krimeve të Rënda.
Ndërkohë, Prokuroria për Krime të Rënda, informon se në bashkëpunim me autoritetet vendase dhe të huaja, është duke vijuar hetimin për zbulimin e porositësve të lëndës narkotike.
Triana u arrestua në Rinas teksa po largohej nga Shqipëria.
Me përkthyes dhe me praninë e dy të afërmve të tij të cilët kishin mbërritur nga Spanja, Cesar Augusto Triana doli për herë të para Gjykatës së Krimeve të Rënda.
FOTO/ Fillon gjyqi ndaj kolumbianit, i arrestuar për 256 kg kokainë
