Shkëlzen Berisha, djali ish-kryeministrit Sali Berisha ka reaguar nëpërmjet një mesazh në rrjetin social “Facebook”, në lidhje me librin e përkthyer në shqip, “Armët dhe çunat” të autorit Guy Lawson-it, i cili sjell historinë e Efraim Diverolit dhe çështjen “Gërdeci”.
‘Një riciklim të rrenës’ e ka cilësuar Berisha artikullin e botuar në media, ndërsa ka risjellë në vëmendje edhe një artikull të botuar në prestigjiozen ‘New Your Yimes’ në vitin 2008, Shkëlzen Berisha ka mohuar çdo lidhje të mundshme biznesi me Efraim Diverolin.
Sipas djalit të ish-kryeministrit, kjo çështje është hetuar në SHBA dhe Shqipëri, por emri i tij nuk është përfshirë në këtë histori.
Mesazhi i plotë i Shkëlzen Berishës në “Facebook”
Riciklimi i rrenës
“Në lidhje me një artikull të botuar nga media afër qeverisë dua të sqaroj sa më poshtë:
Në vitin 2008, menjëherë pas shkrimit të NYT, u kam shpërndarë mediave një përgjigje, ku pasi mohoja çdo lidhje me historinë në fjalë dhe personat e përfshirë në të, theksoja se koha dhe hetimet do t’i provonin ato si të pavërteta.
Kanë kaluar 7 vjet dhe kjo çështje është hetuar në Shqipëri dhe SHBA nga drejtësia amerikane. Protagonistet e saj janë hetuar dhe dënuar, por emri im nuk figuron në asnjë pjesë apo faqe të këtij hetimi për faktin e thjeshtë, se nuk kam pasur asnjë njohje, lidhje, takim, kontakt, marrëdhënie me Efraim Diverolin, ortaket apo biznesin e tij.
Sado ta riciklosh nga gazeta në libër e anasjelltas, sado të mundohesh, e të lodhesh, sado ta përkthesh në gjuhe te ndryshme, një rrene nuk bëhet kurrë e vërtetë. Aq më tepër kur për thurjen e saj autori nuk harron të falënderojë publikisht edhe ‘zogun e Ramës’. Sigurisht kjo nuk pengon askënd, që në mungesë të fakteve, te ngushëllohet e nginjet me rrena”.
