Nishani kërkon rritje të investimeve turke në Shqipëri

Presidenti Nishani tha sot në konferencën e përbashkët për shtyp me presidentin turg Erdogan se ka ende hapësira për investimet turke në vendin tonë. Sipas Kreut të Shtetit shqiptar, sipërmarrësit turq mund të rrisin praninë e tyre në Shqipëri në sektorë si energjia, bujqësia, logjistika, etj.
Raportet mes dy vendeve tona shtrihen në fusha të gjera e të ndryshme, të konsoliduara tashmë. Bashkëpunimin tonë e lidh 89 marrëveshje, memorandume e traktate në fusha të ndryshme. Për 2014 Turqia zë vendin e 4 si partner ekonomik e tregtar për Shqipërinë, tha Nishani.
Në Shqipëri operojnë deri më tani 296 kompani turke në fusha të ndryshme ndërsa në 5 vitet e fundit shkëmbimet ekonomike mes dy vendeve tona kanë njohur rritje, dhe investimet turke kanë arritur në mbi 1 miliard dollarë. Nishani tha se u ra dakord mbi rëndësinë strategjike të projektit TAP. Fusha e transportit është një tjetër fushë prioritare e Shqipërisë dhe investimet turke janë të mirëpritura për investimet rrugore. Presidenti Nishani theksoi se fokus i bisedimeve ishin edhe ngjarjet në Kumanovë. Ai shprehu ngushëllime për jetët e humbura dhe theksoi se kriza që ka përfshirë Maqedoninë nuk duhet të thellohet më tej. “Me presidentin Erdogan i kushtuam rajonit të Ballkanit Perëndimor. Duke njohur rolin kyç që Shqipëria dhe faktori shqiptar luan në këtë rajon ne u ndalëm edhe në ngjarjet shqetësuese në Maqedoni. Dua të shfrytëzoj këtë rast për të shprehur ngushëllimet e mia për jetët e humbura dhe duke dënuar dhunën, të theksoj se kriza që ka përfshirë Maqedoninë nuk duhet të thellohet më tej. U bëj thirrje faktorëve ligj-zbatues të hetojë sa më parë dhe të zbardhin shpejt dhe plotësisht këtë ngjarje plot hije dhe paqartësi që ka tronditur jo vetëm Kumanovën por edhe faktorin ndërkombëtar. Po kështu bëj thirrje për frenimin menjëhershëm të përpjekjeve për ta shndërruar këtë episod të paqartë, në burim konflikti ndëretnik, përfundoi Presidenti Nishani.
Presidenti Erdogan do të jetë i pranishëm në ceremoninë e fillimit të punimeve në Xhaminë e Namazgjasë, në prani të Presidentit Nishani. Po ashtu ai do të pritet në takime të veçanta nga kryeministri Edi Rama dhe kryetari i Kuvendit, Ilir Meta.

/DRONI.al/