Mark Frroku do të gjykohet nga drejtësia shqiptare. Pavarësisht procesit gjyqësor që nis në tetor të këtij viti nga gjykatat e Brukselit, autoritetet shqiptare do të fillojnë një proces paralel për Deputetin Mark Frroku, mbi ngjarjen e vitit 1999 në shtetin belg.
Burime nga organi i akuzës thanë se është duke u bërë gati nisja e hetimeve për vrasjen e Aleksandër Kurtit, në një nga stacionet e Brukselit. Ajo që mesohet është se, Prokuroria shqiptare do të ngrejë kallëzim për veprat penale të “ Vrasjes me paramendim në bashkëpunim”, akuzë kjo e mbështetur nga neni 78/1 dhe nga neni 25 i Kodit Penal. Nene këto që parashikojnë dënime që nisin nga 15 vjet deri në burgim të përjetshëm. Kjo, do të thotë se pavarësisht shkresës për ekstradim nga drejtësia belge dhe që pritet të paraqitet në procesin gjyqësor në Gjykatën e Lartë, gjithnjë në bashkëpunim dhe në rakordim me palën belge, mund të arrihet një akord që Deputeti Frroku të qëndrojë i izoluar në Tiranë dhe të gjykohet nga drejtësia shqiptare në shkallën e saj më të lartë.
Një ditë më parë, Gjykata e Lartë e la në burg pa afat Deputetin Mark Frroku. Ndaj tij janë ngritur zyrtarisht disa akuza.
Në fillim ai u akuzua për kallëzim të rremë, deklarata të rreme para prokurorit. Më pas mbërriti kërkesa e ndalimit nga ana Interpolit belg për vrasje, ndërsa menjëherë u shtuan edhe dy akuza nga Inspektoriati i Lartë i Deklarimit dhe Kontrrollit të Pasurisë, për fshehje të pasurisë dhe refuzim për ta deklaruar atë.
Dokument e prokurorisë tregojnë se Mark Frroku është pyetur në maj të vitit 2013 për një çështje të trafikimit të automjeteve, ndërsa mediat hollandeze dhe belge raportojnë se ai është dënuar 3 vjet për trafik droge nga një gjykatë në Amsterdam.
Mark Frroku do të gjykohet nga gjykata shqiptare
