Një anije amerikane patrullimi ka qëlluar disa herë për të paralajmëruar një luftanije amerikane që iu afrua në një distancë prej 140 metrash, duke injoruar paralajmërimet e tjera.
Lajmi u bë i ditur të martën nga Pentagoni, i cili tha se anija amerikane “USS Thunderbolt” hapi zjarr pasi u përpoq të paralajmëronte iranianët nëpërmjet radios, me fishekzjarrë dhe mënyra të tjera.
Amerikanët thanë se personeli i anijes amerikane gjuajti me mitraloz në ujë si pasojë e shqetësimeve nga një përplasje e mundshme.
Edhe pas paralajmërimeve, anija iraniane qëndroi në ujërat ndërkombëtare në pjesën veriore të Gjirit Arabik, tha Pentagoni duke iu referuar Gjirit Persik.
Anija patrulluese amerikane me 24 marinarë në bord qëndron në bazën amerikane në Bahrejn. Ndërsa madhësia dhe lloji i anijes iraniane nuk bëhet i ditur.
Më pas, lajmi u konfirmua edhe nga Irani, zyrtarët e të cilit thanë se incidenti kishte ndodhur pasi një anije amerikane iu afrua asaj iraniane dhe kishte qëlluar me dy raunde në përpjekje për të frikësuar iranianët.
“Kjo është një sjellje joprofesionale dhe provokative”, tha Garda Revolucionare Iraniane.
Në janar të vitit 2016 Iranianët kapën ekuipazhin e dy anijeve amerikane që kishin hyrë në ujërat iraniane. 10 marinarët amerikanë, përfshirë një grua, u mbajtën në ishujt Farsi, para se të liroheshin pas 15 orësh. Sipas amerikanëve anijet e nisura nga Kuvajti për në Bahrejn kishin pasur probleme teknike.
Irani dhe SHBA-të mbeten dy shtete armike që prej Revolucionit Islamik të vitit 1979 në Iran, i cili solli fundin e monarkisë iraniane të mbështetur nga amerikanët.
VIDEO/ Amerikanët hapin zjarr, u afrohet luftanija iraniane
