Nishani: Resurset e Shqipërisë nuk shfrytëzohen për shkak të burokracive dhe korrupsionit

Presidenti i Republikës ishte në Gjirokastër, ku gjatë bashkëbisedimit me pedagogë dhe studentë të Universitetit “Eqrem Çabej” vuri në dukje fenomenin e korrupsionit. Bujar Nishani theksoi se vendi ynë ka shumë resurse që nuk shfrytëzohen për zhvillimin ekonomik, pikërisht për shkak të burokracive dhe korrupsionit.
Presidenti i Republikës Bujar Nishani gjatë bashkëbisedimit me pedagogë dhe studentë ngriti shqetësimin se resurset e Shqipërisë nuk shfrytëzohen si duhet për shkak të nivelit të lartë të korrupsionit.
“Asnjëri prej këtyre vendeve nuk e ka potencialin dhe kapacitetin e rezervave të prodhimit dhe të eksporteve të naftës. Kjo është përgjegjësi e një shoqërie të tjerë për ta parë hapësirën detare si një destinacion ekonomik. Për këtë duhet të marrim shembuj shumë afër. Në Greqinë fqinje”, vuri në dukje nga Gjirokastra, kreu i shtetit i cili bëri një krahasim të Shqipërisë me vendet e rajonit.
“Sigurisht që problemi është serioz. Unë gjithmonë kam besuar edhe për shkak të eksperiencës që kam pasur shansin dhe fatin të jem, besoj se korrupsioni është një fenomen që ndoshta nuk zhduket”, vijoi më tej Presidenti.
Gjatë vizitës në qytetin e gurtë, presidenti Nishani dekoroi 8 personalitete që kanë kontribuar në fusha të ndryshme, si regjisor, artistë, inxhinier, në shenjë mirënjohje për përpjekjet e bëra në sektorët e tyre.