Sot është dhe afati i fundit për regjistrimin e anëtarëve me të cilët do të përfaqësohen në komisionet zonale të administrimit zgjedhor (KZAZ), ndërsa 14 prilli është afati i fundit për regjistrimin e partive politike. Regjistrimi i kandidatëve të partive politike ka afat deri në 18 prill. Sipas KQZ-së, brenda datës 9 prill partitë politike duhet të sjellin propozimet për anëtarë në KZAZ-të; brenda datës 12 prill KQZ duhet të emërojë anëtarët e këtyre komisioneve dhe ngritjen e tyre. Ndërsa 18 prilli do të shënojë afatin final për regjistrimin e komiteteve nismëtare në KZAZ.
KZAZ-ja përbëhet nga 7 anëtarë dhe sekretari, të cilët emërohen nga KQZ-ja, sipas procedurës së mëposhtme: dy anëtarë propozohen nga partia kryesore e shumicës parlamentare; dy anëtarë propozohen nga partia kryesore e opozitës parlamentare; një anëtar propozohet nga partia e dytë e shumicës parlamentare dhe një anëtar propozohet nga partia e dytë e opozitës parlamentare. Ndërsa anëtari i shtatë propozohet në gjysmën e KZAZ-ve nga partia e parë e shumicës parlamentare, kurse gjysma tjetër nga partia e parë e opozitës parlamentare.
Referuar numrit të votave të fituara për këshillat vendorë në shkallë vendi dhe përfaqësimit në Kuvend, partia e parë dhe e dytë e shumicës parlamentare, të cilave u lind e drejta të propozojnë anëtarë në KZAZ për zgjedhjet vendore të qershorit, janë Partia Socialiste dhe Lëvizja Socialiste për Integrim.
Ndërsa, partia e parë dhe e dytë e opozitës parlamentare, të cilave u lind e drejta të propozojnë anëtarë në KZAZ, janë Partia Demokratike dhe Partia Republikane. Ndërsa, anëtari i shtatë do të përzgjidhet në bazë të shortit që hidhet në KQZ.
Afatet e KQZ-së
9 prill 2015 – afati i fundit për dorëzimin e propozimeve të kandidaturave për anëtar të KZAZ-ve.
12 prill 2015 – afati i fundit i KQZ-së për emërimin e anëtarëve të KZAZ-ve
14 prill 2015 – data e konstituimit të KZAZ-ve dhe mbledhjes së parë të tyre
14 prill 2015 – afati i fundit për regjistrimin e partive politike që do të marrin pjesë në zgjedhjet e datës 21 qershor
18 prill 2015 – afati i fundit për depozitimin e kërkesave nga Komitetet nismëtare për paraqitjen e kandidateve të propozuar nga zgjedhësit.
