Deputeti i PS-së Vladimir Kosta është larguar nga radhët e këtij grupi parlamenatr, sepse është ndjerë i shpërfillur nga kryetari Edi Rama, në përzgjedhjen e kandidaturës për bashkinë e Përmetit. Largimi i tij ka ardhur edhe pas një konflikti me Arben Ahmetajn për kandidaturën e Gilberto Jaçes, të përzgjedhur nga PS për kandidatin e Përmetit, ndërsa ka bërë të ditur se do të jetë deputet i pavarur.
Deputeti Vladimir Kosta ka sqaruar se kjo kandidaturë është bërë pa miratimin e tij dhe se kundërshtimin dhe mospëlqimin e tij për këtë kandidaturë ia kishte shprehur kryeministrit Edi Rama. Gilberto Jaçe është emri i propozuar për bashkinë e Përmetit në ansamblenë e Partisë Socialiste, e mbledhur dje në Grykën e Këlcyrës por duket se një gjë e tillë është bërë pa miratimin e deputetit Kosta i cili nuk ka qenë i pranishëm në ansamble, ç’ka ka sjellë më vonë edhe vendimin e tij për t’u larguar nga PS.
Ndërkohë mësohet se një ditë më parë, mes ministrit Arben Ahmetaj dhe deputetit Vladimir Kosta
është zhvilluar një debat pasi ministri kishte propozuar dhe mbrojtur kandidaturën e Gilberto Jaçes për bashkinë e Përmetit, ndësa deputetit e kishte kundërshtuar, nën argumentimet se nuk e kishte mbështetjen e duhur nga elektorati dhe se ka shpërdoruar fondet, për të cilën edhe e kishte denoncuar edhe më parë.
Mesazhi i plotë i deputetit Vladimir Kosta
“Të nderuar kolegë!
Kandidatura e Përmetit është vendosur kundër dashjes time. E kundërshtova me fakte para kryeministrit aktual por kryeministri, Ahmetaj bashkë me Taulantin dhe të fortët e gazetës ‘Dita’, vendosën Gilberto Jaçen, të cilin unë personalisht e kam denoncuar për hetim të fondeve publike pranë KLSH. Edi Rama as nuk mori mundimin të më dëgjonte për sa i shpjegova. Për sa më sipër dhe për sa s’jam dëgjuar deri më sot në këtë Parti, me keqardhje largohem nga Partia Socialiste si deputeti i pavarur. Ju kërkoj ndjesë për shqetësimin”.
