Bylykbashi propozon ndryshimet në Kodin Zgjedhor: Të inkriminuarit s’mund të kandidojnë në zgjedhjet e 21 qershorit

Deputeti i PD-së, Oerd Bylykbashi, njëherësh kreu i komisionit të dekriminalizimit ka dorëzuar sot në Kuvend projektligjin për Kodin Zgjedhor me ndryshime, i cili sipas tij do pengojë kandidimin e personave me rekorde kriminale në zgjedhjet e 21 qershorit.
Deputeti i PD-së Oerd Bylykbashi tha se me anë të disa amendamenteve të shtuara në këtë ligj, do bëhet e mundur nxjerrja nga politika e individëve me rekorde kriminale.
“Projektligji me ndryshime vjen në kuadër të rezolutës së parlamentit për dekriminalizimin e Parlamentit. Këto ndryshime pengojën kandidimin e individëve me rekorde kriminale në këto zgjedhje, në mënyrë që politika të mos jetë e prekur nga këta individë me cv kriminale. Amendamentet do bëjnë të pamundur që këta të kandidojnë, por edhe nëse zbulohet më vonë ata humbasin sërish mandatin”, sqaroi Bylykbashi.
Deputeti sqaroi se për të hartuar këto amendamente janë bazuar si në modelin italian, atë amerikan dhe britanik që kodi zgjedhor të ketë rregulla të ashpra dhe të forta.
“Unë besoj që jemi në kohën e mjaftueshme që parlamenti ta marrë në shqyrtim këtë pr/ligj, ta miratojë që më 21 qershor këta persona të mos kandidojnë. Do jenë 2 nene në Kodin Zgjedhor që do pengojnë personat e dënuar me vendim gjykate për krime të rënda, apo të dënuar me dy deri në 6 muaj për vepra penale të kryera me dashje edhe raste të krimeve si terrorizim apo krimi i organizuar. Po përpiqemi të bllokojmë që këta persona që kanë molepsur politikën të mos kandidojnë më”, shtoi ai.