Kreu i LSDM-së, Zaev ka shpjeguar lidhur me përgjimet që disponon të bisedave që zyrtarë të politikës në maqedoni kanë bërë me drejtues të politikës në Tiranë: “Kemi dhe biseda ku janë të përfshirë zyrtarë të nivelit më të lartë të Shqipërisë për tema politike, gjatë bisedave me liderët e partive shqiptare dhe unë do të komentoja vetëm deri në këtë pikë sepse në të kundërtën rrezikoj të ndërhyj në integritetin e vendeve fqinje të cilat për ne janë vende mike dhe në asnjë mënyrë qëllimi ynë nuk është ky. Pra ata politikanë e dinë se me kë kanë komunikuar. Por më duhet të theksoj, se qytetarët duhet ta dinë se ky komunikim nuk është i orientuar kundër interesave të Maqedonisë e as Shqipërisë apo Kosovës. Madje politikanët tanë shqiptarë kur bisedojnë me politikanë të caktuar nga Kosova po Shqipëria kanë biseduar në funksion të miqësisë mes dy vendeve, pra këto biseda nuk kanë të bëjnë me plane të fshehta kundër interesave të vendeve fqinje. Disa persona për të cilët nuk kam respekt nga blloku politik shqiptarë sepse kanë tejkaluar të gjitha normat e ndershmërisë, gjithsesi, kur kanë biseduar me politikanë të caktuar nga Shqipëria apo Kosova kanë biseduar në interes të shtetit”.
Zaev ka theksuar ndërkohë se Tirana mund të japë komentet e saj për situatën në Maqedoni për shkak se mbi 20 për qind e popullsisë janë shqiptarë: “Mendimi im është se këshillat që vijnë nga vendet fqinje nëse ato janë miqësore, të sinqerta dhe pa prapavijë gjithsesi se janë të mirëpritura. Republika e Maqedonisë është një vend i pavarur dhe tek ne sipas të gjitha regjistrimeve më shumë se 20 % e popullatës është shqiptare dhe kjo paraqet arsye plotësuese se pse Tirana mund të japë komentet e saj për çështje të caktuara. Por kufiri i ndërhyrjes në punët e brendshme mes dy vendeve duhet të jetë qartë i definuar se deri ku mund të shkohet”.
