Tre televizionet kryesore informative në vend, Ora News, News 24 dhe Abc News, njoftojnë shikuesit e tyre në të gjithë Shqipërinë, se duke nisur nga sot, datë 5 maj dhe deri më 22 maj 2015, kur nis ligjërisht fushata elektorale, nuk do të transmetojnë aktivitetet dhe mesazhet zgjedhore të partive politike.
Në vijim të detyrimit që lind nga Kodi Zgjedhor dhe shqetësimit të kryetares së KQZ, Lefteri Lleshi, për shkeljen që po i bëhet ligjit elektoral, tre televizionet do të pasqyrojnë fushatën zgjedhore brenda afatit 30 ditor të parashikuar në ligj. Duke qenë se këto tre televizione kanë peshën më të madhe të informimit në periudhat zgjedhore, ato u kërkojnë partive politike të shmangin çdo presion dhe të respektojnë detyrimet ligjore.
Nëse forcat politike e gjykojnë se periudha 30 ditore e fushatës është e pamjaftueshme, ato kanë në dorë ta ndryshojnë atë, por jo të bëjnë fushatë në kundërshtim me ligjin që kanë aprovuar vetë. Ora News, News 24 dhe Abc News u kërkojnë gjithashtu partive politike dhe kandidatëve të lejojnë pjesëmarrjen e kamerave dhe gazetarëve në aktivitetet e tyre partiake. Tre televizionet ruajnë të drejtën që materialet e gatshme të servirura nga partitë t’i trajtojnë brenda politikave të tyre profesionale, brenda edicioneve të lajmeve.
Tre televizionet sigurojnë se pasqyrimi i fushatës elektorale pas datës 22 maj do të jetë i plotë, objektiv dhe i paanshëm, duke garantuar hapësirë dhe trajtim të barabartë për partitë politike dhe kandidatët në garë.
Thirrja e KQZ-së, News 24, Ora News dhe Abc News, jo transmetim të aktiviteteve elektorale deri në 22 maj
