Në një moment të debatit mes Metës sot dhe Berishës në parlament, ish-kryeministri i tha i kryetarit të Kuvendit se të punësuarit në institucionet që drejtohen nga partia e Metës paguajnë një pjesë të rrogës tek partia. Praktikisht Meta nuk tha “jo”, ndërkohë debati rrëshqiti në argumenta të tjerë.
Në formën e legjendës urbane, pagesa nga të punësuarit e LSI-së ka kohë që përshpëritet si fenomen që nga viti 2009, kur kjo parti ishte në koalicion me PD dhe mori në menazhim më shumë se 30 për qind të administratës.
Partitë në përgjithësi punojnë me mbledhje kuotash mes anëtarëve. Por mbledhje rrogash mes anëtarëve nuk ka bërë vaki. Ata zyrtarë që pranojnë vendin e punës në këmbim të ndarjes së të ardhurave, përfshihen në këtë marrëveshje, për shkak se nuk kanë mënyrë tjetër për të gjetur punë për profesionin e tyre, ose pse nuk janë të aftë të kryejnë asnjë punë. Ka shumë mundësi që shumica prej tyre të jenë nga këta të fundit.
Por as kjo situatë nuk justifikon feudalizmin e këtyre ditëve, ku paguan qera për të marrë pagën. Kjo nuk është politike, kjo nuk ka lidhje me idenë apo ideologjinë rreth të cilës ndërtohet një parti.
Prandaj Meta duhej të sqaronte më tej akuzën e Berishës. Megjitahtë ka kohë mjaft që të shpjegohet rreth saj. Pasi nuk është vetëm e Berishës, por edhe shumë “gojëve të liga”.
A paguajnë zyrtarët një pjesë të rrogës te LSI!
