Inspektorati i Lartë i Deklarimit dhe Kontrollit të Pasurive dhe Konfliktit të Interesave, ka kallëzuar penalisht në Prokurorinë e Përgjithshme Andis Harasanin për deklarim të rremë të pasurisë. Sipas këtij institucioni, pas kontrollit të plotë të deklaratave të interesave private të subjektit Andis Harasani, për funksionet Drejtor i KESH (2003 – 2005) dhe Deputet i Kuvendit të Shqipërisë (2005 – 2012), kanë rezultuar deklarime të rreme, kontrata fiktive e të falsifikuara, fshehje të pasurive dhe transfertave bankare, të dyshimta e pa burime të ligjshme financiare, në banka brenda dhe jashtë vendit, në shumën rreth 2.600.000 USD.
Pas konstatimit të këtyre fakteve, ILDKPKI ka depozituar kallëzimin penal në Prokurorinë e Përgjithshme për veprat penale të parashikuara nga nenet 257a//2 186 dhe 287 të Kodit Penal.
Siç thuhet edhe në njoftimin e ILDKPKI, ky institucion i ka kërkuar Prokurorisë që “hetimet paraprake të shtrihen më tej, me qëllim për të zbuluar nëse ndodhemi edhe përpara veprave të tjera penale të kryera nga ky subjekt”.
ILDKPKI kallëzon në Prokurori Andis Harasanin, fshehu deklarimin për 2 milionë e 600 mijë dollarë
