Socialistët drejtojnë në Fier, Vlorë, Rrëshen, Mat: Janë më të lumtur?

Lulzim Basha, sot në Burrel, në Mirditë dhe në Klos:
“Çfarë thotë Edi Rama? Mos i jepni votë PD-së se do t’ju shkojë kot? Po t’i pyesim pak këtu në Rrëshen, këtu e keni edhe kryetarin socialist, a mos është ndryshe këtu? A mos ka vende pune këtu? A mos ka investime këtu? A mos ka mirëqenie këtu? Kryetari është socialist. Po në Vlorë? Po në Fier? Po në Korçë? Po në Elbasan? Po në Durrës? Po në Lezhë? Të gjitha këto i qeverisin socialistët, ka dy vite. A mos ka pasur punësim aty? A mos ka pasur investime aty? A mos është shëndetësia falas aty?
Taksat janë rritur, fatura e energjisë është rritur, çmimi i karburantit është rritur. Janë rritur sepse paguajmë sot plot 240 lekë të vjetër për litër më shumë taksë se para dy vitesh. Pyetja është, ku janë paratë tuaja? Ku shkojnë paratë e mbledhura nga taksat e rritura? Borxhin jo vetëm se kanë larë, por e kanë shtuar. Investime të reja nuk kanë hapur, madje edhe investimet që gjetën ecin me ritmin e breshkës, ose i kanë bllokuar. Vende pune nuk kanë hapur, shëndetësi falas jo, arsim dhe akses për të gjithë jo, madje i kanë mbyllur gjysmën e universiteteve. Çfarë kanë bërë me paratë tuaja?”