Gjykata lë në burg të akuzuarin për mashtim me borxhin e CEZ

Gjykata e Tiranës ka caktuar sot masën e sigurisë “Arrest në burg” për Kastriot Ismailaj, administrator i 6 kompanive, i cili akuzohet për mashtrim.
Ismailaj, kishte nën administrim disa kompani, një prej të cilave që kishte si aktivitet kryesor mbledhjen e borxheve të kompanisë së shpërndarjes së energjisë elektrike, CEZ.
Ndaj të pandehurit rëndojnë akuzat për veprën penale “Mashtrim me pasoja tё rёnda, tё kryer nё bashkëpunim” dhe “Pastrimit tё produkteve tё veprës penale” që kapin shifrat mbi 5 milion euro.
Nga hetimet e zhvilluara në kuadër të hetimit të këtij procedimi penal ka rezultuar se Kastriot Ismailaj ёshtё ortak apo administrator i disa shoqërive tregtare tё regjistruara nё Shqipёri, tё cilat pёrgjithёsisht nuk kanё aktivitet tregtar por nё llogaritё e kёtyre shoqёrive janё kryer transaksione finaciare, tё cilat shkojnё nё disa milionë euro. Pak ditë më parë, Prokuroria për Krime të Rënda, në bazë të materialit të dërguar nga Prokuroria e Tiranës që po zhvillon këtë hetim, kërkoi nga Gjykata e Krimeve të Rënda konfiskimin e disa llogarive bankare në emër të këtij shtetasi, në shumën e rreth 3.4 milion dollarëve.
Kërkesa për konfiskimin e pasurisë i është kaluar për veprim Prokurorisë dhe Gjykatës për Krime të Rënda, si organet kompetente për zbatimin e ligjit të ashtuquajtur ‘Antimafia”.
Sipas hetimit të Prokurorisë së Tiranës, nisur nga materiali referues prej institucioneve ligj-zbatuese si Drejtoria e Policisë dhe Drejtoria e Pastrimit të Parave, rezulton se ky shtetas, nëpërmjet manovrave financiare ka krijuar një skemë mashtrimi të madhe, me qëllim përfitimin e padrejtë të pasurive në vlera të konsiderueshme.