Gjykata do të vendosë më datën 10 qershor për deputetet e PS-së, Pjerin Ndreu e Arben Ndoka, në akuzë për dhunën ndaj deputetit demokrat Genc Strazimiri, në korridoret e Kuvendit të Shqipërisë.
Në seancën e sotme të gjykimit, gjatë leximit të konkluzioneve të mbrojtjes, Pjerin Ndreu përmes avokatit të tij ka kërkuar pafajësi, duke pretenduar se nuk është i përfshirë në dhunë.
Ndërsa mbrojtja e deputetit Ndoka ka kërkuar pushim të procedimit penal, me arsyetimin se nuk ka pasur rrahje për shkak të detyrës, por pas një sherri, shumë kohë pas seancës dhe jo në foltoren e Kuvendit.
Seancën e shkruar prokuroria lexoi pretencën duke kërkuar konvertimin e dënimit me burg në orë pune për komunitetin ndaj deputetëve Arben Ndoka dhe Pjerin Ndreu.
Prokuroria e Përgjithshme paraqiti seancën e kaluar konkluzionet përfundimtare në procesin gjyqësor ndaj deputetëve, duke i kërkuar Gjykatës deklarimin fajtor të tyre. Sipas përfaqësuesve të akuzës, Adnand Xholi dhe Artur Selmani, nga shqyrtimi gjyqësor është provuar plotësisht akuza e ngritur ndaj të pandehurve.
Prokurorët kërkuan dënim me 1 vit heqje lirie për të pandehurin Ndoka dhe 8 muaj heqje lirie për të pandehurin Ndreu. Sipas Prokurorisë, nëse deputetët japin pëlqimin, dënimi i tyre me burg të mos ekzekutohet dhe ata të detyrohen të bëjnë punë të papaguar në interes të publikut, përkatësisht 150 orë pune i pandehuri Ndoka dhe 100 orë pune i pandehuri Ndreu.
Po sipas kërkesës së prokurorëve, nëse të pandehurit refuzojnë zëvendësimin e dënimit me burg me punën pa shpërblim, ata të dërgohen në qeli për të kryer dënimin e kërkuar.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
