Qeveria ka miratuar mbrëmë vendimin e parë të saj që lidhet me funksionimin e ri të bashkive pas zgjedhjeve të 21 qershorit. Nëpërmjet këtij vendimi përcaktohet procedura e mbartjes së dokumentacionit, financave personelit dhe detyrimeve nga subjektte e shkrira, bashki apo komuna tek bashkitë e reja.
Lidhen me të punësuarit në bashkitë dhe komunat që nuk do të funksionojnë më , marrëdhëniet e punës ekzistuese, ndërmjet këtyre njësive të shkrira dhe punonjësve të tyre, do të transferohen në bashki, në momentin e konstituimit të organeve të saj. Nga momenti i konstituimit deri në miratimin e strukturës administrative përfundimtare, bashkia është në proces ristrukturimi dhe operon me strukturë tranzitore, e cila miratohet nga kryetari i saj, brenda 1 muaji nga marrja e mandatit.
Për punonjësit me kontratë, që nuk janë nëpunës civilë, marrëdhënia e punës transferohet automatikisht. Nëse gjatë procesit të ristrukturimit punonjësve u shkurtohet vendi i punës apo, për shkak të kualifikimeve dhe kushteve të punës, nuk mund të përshtaten në strukturën provizore apo strukturën e re të bashkisë, atëherë atyre u ndërpritet marrëdhënia e punës, duke respektuar afatet dhe procedurat e njoftimit, sipas dispozitave të ligjit nr.7961, datë 12.7.1995, “Kodi i Punës i Republikës të Shqipërisë”, të ndryshuar.
Për punonjësit që mbulojnë pozicione të shërbimit civil, për të cilët është lëshuar, nga njësia e menaxhimit të burimeve njerëzore (njmbnj), akti i deklarimit të statusit të punësimit, sipas ligjit nr.152/2013, “Për nëpunësin civil”, të ndryshuar, kryhen procedurat e transferimit, të parashikuara në dispozitat e tij.
Për punonjësit që mbulojnë pozicione të shërbimit civil, por njmbnj-ja nuk është shprehur në lidhje me statusin e tyre të punësimit, sipas ligjit nr.152/2013, “Për nëpunësin civil”, të ndryshuar, njmbnj-ja e bashkisë merr funksionet e organit përgjegjës dhe shprehet në lidhje me statusin e tyre të punësimit.
Brenda pesë muajve nga data e konstituimit të organeve përfaqësuese dhe ekzekutive, bashkia duhet të ketë kryer procedurat, për të mundësuar transferimin dhe pozicionimin në kohë të personelit, sipas pikës , dosjet e personelit të bashkive dhe komunave të vjetra duhet të depozitohen pranë bashkisë jo më vonë se një muaj nga momenti i konstituimit të organeve të saj. Ngarkohen personat përgjegjës për çështjet e personelit në NJSH-së për plotësimin e këtij detyrimi brenda afatit të përcaktuar.
Sipas këtij vendimi, Bashkia e re sipas këtij vendimi është trashëgimtari ligjor i njësive të qeverisjes vendore që janë shkrirë në të. Bashkia, me konstituimin e organeve përfaqësuese dhe ekzekutive, merr përsipër të gjitha të drejtat dhe detyrimet ekonomike, financiare, sociale apo të tjera, të karakterit civil dhe administrativ, të njësive të qeverisjes vendore që janë shkrirë, përfshirë edhe të gjitha detyrimet që rrjedhin nga vendimet gjyqësore të formës së prerë.
Janë mbi 400 institucione që do të shkrihen në 61 gjithsej në të gjithë vendin ndërkohë që rreth 80 mijë të punësuar do u duhet të rishikojnë vendin e punës përmes procedurave të mësipërme.
