Të dhënat e fundit të Autoritetit të Mbikëqyrjes Financiare tregojnë se shqiptarët sigurojnë më shumë automjetet sesa jetën e tyre. Rreth 62.8 për qind e tregut i përket pikërisht sigurimit të makinave, që është i detyrueshëm me ligj. Ekspertët e shpjegojnë këtë dukuri me mungesën e kulturës së sigurimit në Shqipëri, por edhe me nivelin e ulët të jetesës
Shqiptarët sigurojnë më shumë automjetet sesa jetën e tyre. Të dhënat e fundit të Autoritetit të Mbikëqyrjes Financiare tregojnë se tregu i sigurimeve në Shqipëri mbetet i orientuar drejt sigurimit të automjeteve, që është i detyrueshëm me ligj.
Kështu, për periudhën janar- prill të këtij viti, 62.84 për qind e tregut përbëhej nga sigurimi i makinave, 20.97 për qind nga sigurimi i pronës dhe vetëm 16.19 për qind nga sigurimi i jetës dhe shëndetit.
Ekspertët e shpjegojnë një ndarje të tillë të tregut me kulturën e paktë të sigurimit në Shqipëri, por edhe me nivelin e ulët të jetesës, ku janë të shumtë ata që nuk do të përballonin dot sigurimet vullnetare.
Tashmë prej shumë kohësh është folur për hartimin e një ligji që do të bënte të detyrueshëm edhe sigurimin e jetës, por ende nuk ka një draft konkret të hartuar nga institucionet shtetërore.
Të dhënat e Autoritetit të Mbikëqyrjes Financiare tregojnë gjithashtu se edhe dëmet që janë mbuluar nga kompanitë e sigurimit për klientët kanë qenë kryesisht për automjetet. Të dhënat tregojnë se për periudhën janar- prill të këtij viti për dëmet nga aksidentet rrugore ose ndryshe për sigurimin e detyrueshëm motorik u paguan rreth 618 milionë lekë ose 61. 57 për qind e totalit të dëmeve të paguara nga kompanitë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
