Deputeti socialist Tom Doshi u përfshi në fushatë vetëm në një bashki, atë të Vaut të Dejës përgjatë gjithë kohës së fushatës duke lënë mënjanë inatin me PS-në si dhe cështjen e atentatit që u përgadit ndaj tij sikurse ka dëshmuar.
Por sot në orët e mbrëmjes u mbyll numërimi i votave në këtë bashki dhe kandidati që ai mbështeti ka humbur me një diferencë të madhe. Gjok Lleshi i PS-së ka marrë 2000 vota më pak se Zef Hila i PD-së duke zhbërë kështu mitin e Doshit në disa zona të Shkodrës si i vetmi socialist që mund të fitojë.
Humbjes së Doshit i është bashkuar edhe LSI në Shkodër që pritet të shënojë një rezultat të ulët për Keti Bazhdarin. E vetmja bashki ku ende nuk është e qartë nëse do të fitojë PS apo PD është ajo e Koplikut, ku gara ende vazhdon dhe pritet të numërohen edhe rreth 50 kuti votimi ose pak më shumë se gjysma.
