Në vijim të operacioneve për parandalimin e Trafikimit të Qenieve Njerëzore, Sektori për Trafiqet e Paligjshme në Drejtorinë e Policisë Qarkut Durrës, ka finalizuar me sukses operacionin e koduar “Azili”, ku u bë e mundur arrestimi në flagrancë i shtetasve Besnik Gjoka 27 vjeç, banues në Fushë-Krujë dhe Shaban Gjoka 25 vjeç, banues në Fushë-Krujë.
Arrestimi i tyre u bë sepse pas një hetimi 3 mujor Seksioni për Trafikun e Paligjshëm, në Drejtorinë e Policisë Qarkut Durrës në bashkëpunim me Prokurorinë e Rrethit Krujë,kanë dokumentuar se ata, në bashkëpunim me njëri-tjetrin kanë dërguar rreth 100 shtetas në Gjermani, me qëllim për të përfituar azil duke i ndihmuar për të kaluar në mënyrë të paligjshme kufirin. Pjesa më e madhe e personave të larguar kanë pasur problem me vendet në Zonën “Shengen”.
Të arrestuarit,me anë të mjeteve të tyre i transportonin njerëzit në itenerarin Kosovë-Serbi-Hungari-Austri-Gjermani kundrejt pagesave që varionin nga 500 deri në 1500 Euro për person.
Për këta dy persona Gjykata e Rrethit Gjyqësor Krujë kishte vendosur masën e sigurisë”Arrest me burg”për veprën penale “Dhënie ndihmë për kalim të paligjshëm të kufirit”, në bashkëpunim parashikuar në nenet 298 dhe 25 të Kodit Penal.
Durrës, “Azili” prangos dy vëllezër, trafikuan 100 persona në Gjermani
