Spikerja e mirënjohur e Top Channel , simpatikja Beti Njuma nuk e ka heshtur por ka thënë atë që mendon për “Zjarr TV”, një televizion ku “kolege” japin lajmet me gjoks zbuluar.
Intervista e folëses provokuese të lajme të “Zjarr TV” Enki Braçajt për “Panorama”, e ka nxitur Betin të reagojë përmes Facebook-ut. Betin Njumën e shqetëson fakti se Enki po krijon në publik bindjen e gabuar se spikeret që ia kanë dale, pale ç’kanë bërë. Beti Njuma replikon me spikeren e zhveshur dhe i thotë, “Mos shkel mbi veten!”, dhe tregon historinë e saj.
Mesazhi i plotë i Beti Njuma
“Dua t’i them Enxhit ( Enkit) dhe shumë vajzave të tjera si Enxhi se kjo jo vetëm nuk është aspak e vërtetë, por krijon përfytyrimin dhe bindjen kryekëput të gabuar se NE që ia kemi dalë mbanë në këtë profesion, pale ç’kemi bërë! E dashur Enxhi, po të them me sinqeritetin më të madh, asnjë nga ato “kompromiset” që nënkupton ti! Përkundrazi, unë personalisht kam djersitur shumë dhe më janë dashur vite për të arritur ku jam. Kam punuar që në 6 të mëngjesit në vitet e Universitetit në “Radio Tirana” me honorare qesharake (sa për të blerë çamçakëzë kur thoshte një miku im), kam bredhur kudo nëpër Shqipëri kur e ka dashur puna, kam provuar terrenin në zhegun e verës dhe në kulmin e thellimit. Kam marrë pa fund kënaqësi profesionale, por edhe kam qarë, jam mërzitur, më kanë hequr nga puna, më kanë futur shkopinj nën rrota, kam gjetur shumë dyer të mbyllura dhe ndonjë edhe më është përplasur surratit. Kam pasur fat që kam punuar me profesionistët më të mirë të gazetarisë, jam krenare për rrugëtimin që kam bërë dhe që kurrë nuk kam shkelur mbi veten! As ti mos e bëj! Rrëzoji paragjykimet, lexo, mëso, puno, mos u dorëzo e mos harro: Rome ëasn’t built in a day!”.
