Kreu i Zyrës Vendore të Regjistrimit te Pasurive të Paluajtshme (ZVRPP) në Lushnjë është arrestuar nga policia ditën e sotme pasi akuzohet për “korrupsion pasiv”. Ndalimi i 29-vjeçarit Elvis Bajaziti është bërë pas një urdhri të Prokurorisë.
Së bashku me Bajazitin është ndaluar edhe shoferi i tij Aurel Tiranishti, mbi të cilin rëndon e njëjta akuzë.
Bajaziti dhe Tiranishti u kapën duke i marrë 3000 euro qytetarit me inicialet A. P., ryshfet ky në këmbim të një certifikate pronësie.
Lajmi konfirmohet edhe nga burimet zyrtare të drejtorisë së Policisë së Qarkut ët Fierit.
“Sektori për Krimin Ekonomik e Financiar, në Drejtorinë e Policisë së Qarkut Fier, në bashkëpunim me Prokurorinë e Rrethit Gjyqësor Lushnjë, mbas një hetimi me metoda speciale hetimi, bëri ekzekutimin e urdhrave të ndalimi të prokurorisë, gjithashtu si rezultat i kësaj pune u bë i mundur kapja në flagrancë i shtetasit, Elvis Bajaziti, vjeç 29 ,lindur e banues në Lushnjë,me detyrë Drejtor i Hipotekës Lushnjë dhe shoferin e tij, që luante rolin e sekserit shtetasin Aurel Tiranishti, vjeç 35 lindur e banues në Lushnjë. Këta shtetas në bashkëpunim me njëri tjetrin, u kapën në flagrancë duke i marr 3000 euro shtetasit me iniciale A .P.,nga qyteti i Lushnjës në këmbim të dhënies së certifikatës së pronësisë, duke kryer veprën penale të ‘Korrupsionit pasiv’ dhe ‘Ushtrim i ndikimit të paligjshëm ndaj personave që ushtrojnë funksione publike’, parashikuar nga neni 259 e 245/1 i Kodit Penal”, saktësojnë zyrtarisht burimet e policisë lokale.
FOTO/ Lushnjë, mori 3000 euro për një certifikatë pronësie, pranga Regjistruesit dhe shoferit
