Gjykata e Shkallës së Parë e Tiranës ka dënuar një mjek të një spitali privat, i cili akuzohej për mjekim të pakujdesshëm. Ymer D. është shpallur fajtor dhe është dënuar me një vit burg, por që më vonë iu konvertua me kusht. Sipas vendimit, mjeku mori përsipër të kuronte një paciente me probleme në veshka, e cila gjatë operacionit në muajin shkurt të vitit 2014 humbi jetën, për shkak se mjekët i prenë një venë.
Të afërmit e Luiza Latit denoncuan dy mjekë, por gjykata dënoi vetëm njërin prej tyre.
Në polici ka bërë kallëzim Arted V., nipi i të ndjerës, i cili duke shprehur dyshimet se vdekja e gjyshes së tij, nuk ka ardhur për shkaqe natyrore, por si pasojë e ndërhyrjes së gabuar kirurgjikale nga ana e mjekut Ymer D., ai ka paraqitur kallëzim penal.
Mjekët kanë pohuar se vdekja nuk ka ardhur si pasojë e veprimeve të tyre të pakujdesshme, pasi ata i kanë marrë të gjitha masat që pacientes t’i sigurohej i gjithë mjekimi i duhur, madje duke marrë dhe specialistë të fushës për emergjencën që ndodhi.
Avokatët kërkuan pafajësi.
Mbrojtja e të pandehurit, duke i kujtuar gjykatës se i pandehuri Ymer D. nuk është magjistar, kujtoi se ai nuk mund të zgjidhë rastet fatkeqe, duke e identifikuar rastin në gjykim si një rast të tillë.
Ndërkohë Xhemal K., ka pohuar se ai ka qenë asistent dhe mjek primar ka qenë Ymeri.
Në përfundim të gjykimit prokuroria kërkoi për Xhemalin dënimin me 1 vit e 6 muaj burg, ndërsa për Ymerin dënimin me 2 vite burg.
Në vendimin e saj, Gjykata e Tiranës, dënoi 1 vit burg me kusht mjekun Ymer D. dhe shpalli të pafajshëm mjekun tjetër Xhemal K.
Dënohet mjeku për vdekjen e një paciente në operim
