DËSHMIA E PLOTË NË PROKURORI/ Monika Kryemadhi: Për çështjen “Doshi”, familjarisht nuk kemi pasur konflikt me Tomën, në qoftë nevojitet mund të ballafaqohem me atë

Deputetja e LSI-së, Monika Kryemadhi, ka deklaruar në Prokurorinë e Krimeve të Rënda se për atentatin e pretenduar ndaj Tom Doshit është njoftuar fillimisht nga bashkëshorti i saj, Ilir Meta, njëkohësisht edhe kryetar i Kuvendit të Shqipërisë.
Sipas dokumenteve të zbardhura pak muaj pas dëshmisë së saj të dhënë më 10 mars të këtij viti pranë organit të akuzës, Kryemadhi ka thënë se deputeti Tom Doshi ka pretenduar se atentati për eliminimin fizik të tij do të bëhej me qëllim destabilizimin e politikës për shkak të humbjes së Partisë Demokratike në Shkodër.
Monika Kryemadhi ka bërë një deklaratë me dëshirën e saj në Prokurori dhe më pas i është përgjigjur interesit të prokurorëve të çështjes “Doshi”.
Kryemadhi ka thënë para prokurorëve se në kohën kur Tom Doshi ka folur publikisht për atentatin e pretenduar ndaj tij ka qenë në Beograd, ndërsa për akuzat që ngriheshin ndaj bashkëshortit të saj, Ilir Meta, thotë se mes tyre dhe deputetit ka pasur një ballafaqim në ambientet e një lokali pranë një hoteli të njohur në Tiranë.
Gjithashtu, Monika Kryemadhi ka hedhur poshtë pretendimet e Tom Doshit se një e njohura e saj dekonspironte hetimet në prokurori. 

Dëshmia e plotë e Monika Kryemadhit në Prokurorinë e Krimeve të Rënda:
Me vullnetin e tij të lirë shtetasja Monika Kryemadhi deklaron se:
“Në lidhje me sa pyeteni për të dhënë shpjegime rreth procedimit penal Nr.63 të vitit 2015, riregjistruar për Veprën penale “Vrasje të funksionarëve publikë” e mbetur në tentativë e parashikuar nga neni 79/a dhe 22 i Kodit Penal, referuar deklarimeve të dhëna nga ana e shtetasit Tom Doshi para mediave audio-vizive dhe në rrjete sociale, ku përmendet dhe emri i bashkëshortit tim Ilir Meta, si organizator dhe porositës i kësaj vrasje, kam për të shpjeguar si më poshtë:
Rreth muajit Shtator të vitit 2014, kam qenë në zyrat e Kryesisë së Kuvendit kur në mesditë jam telefonuar nga Ilir Meta dhe më ka kërkuar të shkoja tek Sheratoni, tek kafja përjashta. Kur jam takuar me Ilirin i cili ishte me Tom Doshin, ai më pyeti nëse njihja një Toni që kishte një lokal pranë shtëpisë sonë. Unë ju përgjigja që atë person e njihja si “Toni i Kombinatit”
Iliri më pyeti nëse e njihja dhe unë i thashë që di vetëm që është Toni i kombinatit pasi ka qenë në fushatën e Igli Toskës në zgjedhjet e vitit 2005. Toma më pyeti nëse kamerat e shtëpisë sonë kishin fushëpamje tek lokali i Tonit për të parë se kush hynte dhe kush dilte nga ai lokal. Unë i jam përgjigjur që kamerat shohin vetëm hyrjen e shkallës sonë. E pyeta se përse i duhej kjo dhe Iliri më tha se Toma kishte një person i cili i kishte thënë që ky Toni ka porositur vrasjen e Tomës dhe Mhill Fufit në emër të Agim Ramës, Eugen Beçit dhe Agron Kuliqit. Unë e pyeta se ç’lidhje kishte me ne dhe Toma më tha, që këtij personi i kishin thënë se do e mbronte Ilir Meta. Unë i kërkova të më tregonte më shumë, dhe Toma më tha se këtij personi i ishte thënë nga Toni që kishte një porosi për të vrarë Tom Doshin dhe Mhill Fufin. E kam pyetur se çne, dhe Toma më tregoi se i ishin ofruar 300 mijë euro dhe vrasësi i porositur i kishte thënë janë shumë pak duhen dhe se duheshin 500 mijë.
Sipas Tomës, Toni ishte ngritur nga tavolina dhe kishte shkuar në një tavolinë tjetër ku ishin Agim Rama, Agron Kuliqi dhe Eugen Beçi. Pasi Toni ka takuar këta persona dhe ka marrë dakortësinë e tyre për shumën prej 500 mijë euro, ka shkuar përsëri tek vrasësi dhe ka rënë dakord për shumën prej 500 mijë euro.
Toma më tha se kur kanë dashur ti bëjnë atentatin e parë, sipas të cilit do të hidhnin në erë Tomën, vrasësi i kishte thënë se Toni i kishte kërkuar që ta shpërthente bombën, por vrasësi nuk kishte dashur pasi kishte pasur shumë njerëz, dhe Toni kishte insistuar duke i thënë që kishte Ilir Metën që do e ndihmonte.
Toma më tha që këtë ngjarje e bënte Sali Berisha për të destabilizuar vendin. Ky takim mund të ketë zgjatur rreth 1 orë. Pas këtij momenti unë jam larguar dhe në lokal kam lënë sërish Tomën dhe Ilirin. Në bisedën e bërë, Toma nuk më tregoi se kush e kishte vënë në dijeni për këtë ngjarje. E ka pyetur Tom Doshin se ç’fitonte në këtë mes Ilir Meta dhe ai më tha se paguan Agim Rama për të destabilizuar politikën, ai e lidhte këtë gjë me humbjen e PD-së në Shkodër.
Nuk jam shumë e sigurtë, por Toma tha që personin i cili ishte porositur për vrasjen, e kishte regjistruar në video nën kërcënimin e pistoletës dhe e kishte marrë në shtëpinë e tij. Me sa kujtoj, ai shprehej që e kishte fshehur në shtëpinë e tij pasi kishte hall se mos e vrisnin.
Toma tha se kishte thirrur edhe Prokurorin e Përgjithshëm Adriatik LIallën dhe i kishte treguar për problemin, të nesërmen pas takimit me Adriatik Llallën, Tonit i është bërë atentat. Ndaj dhe për këtë fakt Tomës i kishin lindur dyshime. Pas atij momenti nuk jam takuar më me Tomën dhe për këtë pretendim të tij, jam vënë në dijeni vetëm këto ditë në media.
Pas disa ditësh nga biseda me Tomën kam dijeni që bashkëshorti im Ilir Meta ka vënë në dijeni kryetarin e Komisionit të Sigurisë Spartak Braho, Prokurorin e Përgjithshëm dhe Saimir Tahirin Ministrin e Brendshëm për çështjen e Tomës, e bëra detyrën time dhe nuk kam përse të merrem me pretendimet e Tomës.
Gjithashtu, kam për të thënë se më datë 2 Mars 2015, kam qenë në Beograd për vizitë zyrtare dhe jam vënë në dijeni që deputeti Tom Doshi kishte bërë një deklaratë për shtyp në të cilën akuzonte Ilir Metën si porositësin e vrasjes së Tom Doshit. Pas këtij momenti është publikuar edhe një video në të cilën paraqitej një person i ashtuquajtur Duri dhe fliste për këtë gjë. Pas momentit që jam kthyer nga Beogradi jemi shqetësuar dhe sot e kësaj dite nuk e kuptojmë shkakun ose arsyen se përse Toma na e bën këtë gjë.

A i njihni shtetasit Fatjon (Toni) Skënderaj “Toni i Kombinatit”, Rezi Skënderaj, Imer Lala, Eugen Beci, Agim Rama, Agron Kuliçaj, Ylli Xhaxhollari dhe Durim Bami, nëse po cilët prej tyre, në çfarë rrethanash?
Unë nuk njoh asnjë prej tyre përveç shtetasve Ymer Lala, Agron Kuliçaj, Agim Rama dhe Fatjon Skëderaj. Ymer Lalën e njoh si fytyrë dhe si Dibran, por me të nuk kam kontakte. Ndërsa Tonin e Kombinatit, e njoh si personazh meqenëse ka qenë i angazhuar në fushatën elektorale, të Igli Toskës në vitin 2005, e njoh vetëm si fytyrë, por nuk kam ndonjë njohje me të. Sa i përket lidhjes së emrit “Toni Kombinati” me emrin Fatjon Skënderaj, e kam bërë vetëm pas deklaratës së Ministrit të Brendshëm Saimir Tahiri. Gjithashtu, bëj me dije faktin se personit me emrin “Toni i Kombinatit” nuk i kam pasur as numrin e celularit dhe nuk kam komunikuar ndonjëherë me të. Agim Ramën e njoh pasi është komshi me ne tek Gjiri i Lalzit, por nuk kam ndonjë shoqëri me të. Ndërsa Agron Kuliçajn e njoh për shkak të detyrës që ka ushtruar në polici, me të cilin kam thjesht njohje. Eugen Becin nuk e kam të njohur. Ndërsa Durim Bamin (Durin) nuk e njoh fare, për herë të parë emrin dhe fytyrën e tij e kam parë në media pas arrestimit të tij.

Nga deklarata e Tom Doshit të bërë në media më datë 10.03.2015, ndër të tjerash ka thënë se “kam informacione se hetimet që po bëhen për akuzat e mia ndaj Metës janë të dekonspiruara. Një shoqe e Monikës raporton çdo ditë për ato që ndodhin aty”. Ç’keni për të thënë rreth kësaj deklarate ?
Unë nuk kam as shoqe dhe as shokë që punojnë në Prokurori. Nuk kam asnjë lloj informacioni apo të dhëne se çfarë po bëhet me çështjen. Në lidhje me një deklaratë të tillë të deputetit Tom Doshi, apo dhe për çdo pretendim tjetër të tij, jam e gatshme që të përballem me Tomën.

Ju ose familjarët tuaj keni pasur ndonjë konflikt, debat, pakënaqësi, apo interes me deputetin Tom Doshi?
Jo, as unë dhe as burri nuk kemi pasur probleme ose interes me shtetasin Tom Doshi.

A njiheni me shtetasit Mark Frroku dhe Mhill Fufi, nëse po prej sa vitesh dhe në çfarë rrethanash?
Këta persona i njoh pasi i kam koleg në parlament, por kam thjesht përshëndetje.
Gjë tjetër nuk kam për të shtuar.

/DRONI.al/