Flamuri kuban është valëvitur mbrëmë në Ambasadën e Kubës në Uashington, për të parën herë pas 54 vitesh, derisa Shtetet e Bashkuara dhe Kuba i kanë ripërtërirë marrëdhëniet diplomatike, duke e hapur një kapitull të ri në raportet ndërmjet ish-armiqve nga periudha e Luftës së Ftohtë.
Ministri i jashtëm kuban, Bruno Rodriguez, e ka kryesuar rihapjen e ambasadës në Uashington, që paraqet kthesë të madhe në shkrirjen diplomatike ndërmjet dy vendeve, që filloi me shpalljen e presidentit, amerikan, Barack Obama, dhe atij kuban, Raul Castro, më 17 dhjetor të vitit të kaluar.
Sekretari amerikan i Shtetit, John Kerry, vlerësoi se kjo “ishte ditë historike”.
“Kjo është vizita e parë në Departamentin e shtetit nga një ministër i jashtëm kuban prej vitit 1958. Kjo, po ashtu, shënon vazhdimin e lidhjeve normale diplomatike ndërmjet dy vendeve tona dhe rihapjen e ambasadave tona, pas thyerjes që ka zgjatur 54 vjet. Pra, është një ditë historike. Një ditë e largimit të barrierave”, tha John Kerry.
Në kryeqytetin Havanë në Kubë, po ashtu është rihapur Ambasada e Shteteve të Bashkuara, por me një solemnitet të thjesht. Flamuri amerikan nuk do të ngrihet atje deri më 14 gusht, kur Havanën do ta vizitoj sekretari amerikan i shtetit, John Kerry.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
