Erion Veliaj: Për linjat urbane jashtë standardit nuk ka më rinovim kontrate

Kryetari i Bashkisë së Tiranës, Erion Veliaj ka qenë i ftuar sot në emisionin e mëngjesit “Koha për t’u zgjuar” të gazetarit Bashkim Hoxha në News24 ku i është përgjigjur shqetësimeve të dhjetëra qytetarëve.
Duke u ndalur te shërbimi urban në kryeqytet, Veliaj tha se është në dijeni të gjendjes së tij duke paralajmëruar marrjen e masave, deri në heqjen e licencës për linjat problematike.
“Kam qenë në shumicën e linjave të autobusëve të Tiranës. Ajo që do të bëj është se përveçse do të shoh çdo linjë, do të marr edhe feedbackun e qytetarëve, kështu që asnjë linjë të mos habitet kur të mos i rinovohet licenca. Kam hipur në autobusë që i ngjajnë më shumë zisave ushtarakë të qëmotit, ndërkohë që duhet të ishin ndryshe”, tha Veliaj.
Kreu i Bashkisë së Tiranës konfirmoi se do të ketë një investim në zonën e “Irfan Tominit” ku pranë pallatit me shigjeta do të ndërtohet një urë për këmbësorë.
Veliaj tha se Bashkia ka ndryshuar strategji dhe tashmë nuk do të preket nga pak çdo njësi por do të merren me radhë.
Veliaj foli edhe për mbledhjen e mbeturinave në kryeqytet, për të cilën tha se janë gjetur 31 mln dollarë fatura të papaguara nga kompanive.
Kryebashkiaku i Tiranës u bëri thirrje qytetarëve të mos ndërtojnë në bregun e lumit, ndërsa pohoi se ka filluar një investim për rehabilitimin e bregut të lumit.
Për vjedhjen e kapakëve të pusetave, Veliaj tha se do të ketë dënime të veçanta dhe se pikërisht për këtë problem do të ketë një takim me 24 administratorët.
“Jemi duke bërë një investigim, për të parë se si udhëton një kapak pusete nga vandali që e vjedh deri tek fonderitë që e marrin për skrap. Sot kemi një takim me administratorët dhe do të publikojmë një listë me dënimet”, tha Veliaj.

/DRONI.al/