Ndërtuesit në Tiranë mund të detyrohen të paguajnë taksë pasurie për apartamentet që janë të pashitura nëse nuk vendosin të ulin cmimet dhe të clirojnë ngërcin në tregun e banesave në kryeqytet.
“I kam bërë apel Shoqatës së Ndërtuesve që të ulë çmimet e apartamenteve të pashitura. I mbajnë apartamentet bosh dhe nuk e ulin çmimin. E di që shteti nuk ia cakton dot çmimet privatit pasi jetojmë në kapitalizëm, por shteti mund të bëjë këtë: taksën e pronës ta paguajnë edhe ndërtuesit e apartamenteve të pashitura. I bëj këtë apel ndërtuesve: nëse doni të mbani çmime stratosferike, atëherë mos kërkoni që të vazhdojnë të jepen leje ndërtimi në Tiranë”, tha sot kryetari i bashkisë së Tiranës, Erion Veliaj.
Disa qindra apartamente janë të pashitura në Tiranë, ndërkohë që ndërtuesit ndodhen në kurthin e bankave që nuk lejojnë cvlerësimin e apartamenteve ku mbështetet garancia e kredive të marra nga bizneset dhe nevojës për likuiditet që bizneset kanë për të kryer investime dhe shpenzime të reja.
Ulja e cmimeve të shitjes duke ruajtur garancitë e fitimit do të krijonte në Tiranë vende të reja pune për shkak të ritmit që do të shoqëronte hapjen e tregut, ndërkohë që do të ndihmonte edhe në zgjidhjen e problemit të strehimit për familje me të ardhura të mesme apo të vogla.
