Prokuroria paraqiti në mbledhjen e Këshillit për Rregulloren, Mandatet dhe Imunitetin 3 aktet që vërtetojnë fajësinë e deputetit Prenga për akuzat që rëndojnë mbi të: “Plagosje me dashje”, “armëmbajtje pa leje” dhe “kanosje në bashkëpunim”, për të kërkuar autorizimin e arrestimit të Armando Prengës.
Përfaqësuesi i prokurorisë, argumentoi se Prenga ka shkuar në lokalin e Gjok Calit dhe është konfliktuar në Fushë-Kuqe. Gjithashtu, sipas prokurorisë Prenga ka qëlluar me armë përpara komisariatit të Laçit, ku janë gjetur 9 gëzhoja, 5 të një pistolete dhe 4 të një automatiku. Prokuroria argumeton se Prenga ka qëlluar në këmbë Tom Calin. Organi i prokurorisë tha se Prenga nuk ka kryer qitje me armën për të cilën kishte leje, por ai ka qëlluar me armë për të cilat nuk kishte leje.
Bazuar në argumentet e paraqitura, Prokuroria kërkoi arrestimin e deputetit.
Ndërsa në fjalën e tij, avokati i deputetit tha se akuzat ndaj klientit të tij janë pa argumente dhe kërkoi që të mos manipulohen provat. “Asnjë nga policët në komisariat nuk e thotë që Armando Prenga ka qëlluar me armë. Pse nuk doli një polic të thotë? Si është e mundur që kishte një pistoletë me leje dhe atje është përdorur një armë dhe një automatik? Prokuroria ka disa versione për ngjarjen. Shkon gjithë familja Cali për të bërë një denoncim, pse u lejuan gjithë këto persona me armë të ftohta të shkojnë me armë në komisarit? Pse ka të plagosur nga të dyja palët? Pse nuk u pyetën asnjë nga këto persona? Relacioni për mua është shumë i gabuar, relacioni nuk ka asnjë provë bindëse. Kush i krijoi këto prova?…”,- thotë avokati.
Fjalën e mori Armando Prenga i cili tha se është i akuzuar padrejtësisht, pasi sipas tij kishte shkuar me vonesë në komisariat dhe nuk ka hyrë ai në konflikt fizik apo me armë. Ajo që po i ndodh atij, sipas Prengës është një trillim nga PD për konfliktin e luginës së Patokut dhe se ky konflikt nuk i ka ndodhur vetëm atij, por edhe personave të tjerë.
Prenga tha se kjo është e vërteta dhe se do tregohet i duruar, duke i kërkuar drejtësisë të tregohet e kujdesshme dhe e saktë.
