Qeveria thyen një premtim të saj që të nxjerrë nga qarkullimi karroatrecët duke shpallur një tender për koncesion për këtë shërbim me procedura të dyshimta.
Sikurse shihet në faksimile të dokumentit, policia ka njoftuar një tender afërisht 1 milion dollarë për shërbimin e karroatrecëve, i cili do të zhvillohet më 12 tetor.
Tenderi zhvillohet më më 12 tetor, por në kërkesën për dokumentet thuhet se shërbimi do të nisë që më 1 tetor. “Në pikën 2.3 të dokumenteve “Kohëzgjatja e kontratës ose afati kohor për ekzektimin thuhet: Kohëzgjatja në muaj, 27, ose 822 ditë, ose duke filluar nga 01/10/2015 me përfundim 31/12/2017”. Ky fakt e ka bërë gazetën Panorama të ngrejë dyshime se fituesi është paracaktuar dhe tenderi është thjesht formal. “Pra, hapet një tender, ofertat (dhe rrjedhimisht fituesi) do të shpallen në datë 12 tetor, ndërkohë që shërbimi nga fituesi duhet të ketë nisur nga data 1 tetor. Ndoshta firma fituese është e ditur paraprakisht. Ka shumë mundësi që tenderi të jetë thjesht një procedurë turinë, për të kaluar parate te “fatlumi”, shkruan panorama. Sipas gazetës ka edhe një tjetër element që e bën më të besueshëm dyshimin se fituesi i tenderit dihet. “Sot ky fatlum është në Arbanë (pika e bllokimit të automjeteve) dhe sërish në dokumentet e tenderit të ri, i plotëson kushtet . Duhet të jetë 3 – 5 kilometra nga qyteti – thuhet në dokumentet e tenderit, pa përcaktuar pikën e nisjes së matjes. Me shumë mundësi do të jetë vija e verdhë e qytetit”, sipas gazetës.
Shërbimi i karroatrecit u mbyll nga qeveria që në vjeshtën e vitit 2013 kur e majta mori pushtetin. Vetë ministri i Brendshëm deklaroi se mbajti një premtim të fushatës. Sipas tij qytetarët janë dhunuar teksa makinat u merreshin me karroatrecët e kompanive të kontraktuara nga policia. Edhe vetë Tahiri e kishte pësuar nga kompani të tilla teksa i morën një natë makinën në rrugën Komuna e Parisit.
