Nuk ka asnjë përpjekje të qeverisë shqiptare për të larguar Prezencën e OSBE-së në Shqipëri. Sekretari i Përgjithshëm i Ministrisë së Punëve të Jashtme, Qirjako Qirko, gjatë një interviste për shqiptarja.com shpjegon se nuk kërkohet në asnjë mënyrë largimi i kësaj organizate, dhe as tkurrja e saj.
Qirko sqaron se shkresa e nisur prej tij disa ministrive, ku kërkohej informacion mbi projektet e OSBE-së në vendin tonë, synon vetëm të inventarizojë projektet dhe marrëveshjet, dhe në asnjë mënyrë, nuk ka për qëllim tkurrjen e misionit të OSBE-së. Sekretari i Përgjithshëm i MPJ-së shprehet se në kuadër të një VKM-jë që qartëson rolin e Ministrisë së Jashtme në marrëdhëniet me shtete apo organizata shumëpalëshe, shkresa të tilla ministrive u janë dërguar edhe në lidhje me fondet që vijnë nga shtete apo organizata të tjera.
Duke shpjeguar letrën që u është dërguar institucioneve ai thotë se fjala “tkurrje” e përfshirë në tekst nuk i ka rënë ën sy. “Shkresat që më kanë ardhur për këtë çështje drejtuar institucioneve kanë qenë një vandak i madh. Por kjo shkresë nuk ka të bëjë me rishikimin e statusit të OSBE-së në vendin tonë. Absolutisht nuk ka të bëjë. Fjala “tkurrje” është një frazë parazitare, të cilën sinqerisht, nuk e kam parë me vëmendje, se po ta kisha parë do ta kisha fshirë. Por qëllimi i kësaj shkrese dhe të tjerave, ka qenë pikërisht ky, inventarizimi i projekteve, marrëveshjeve që kemi në marrëdhëniet dy palëshe, shumëpalëshe e kështu me radhë”, shpjegon zyrtari i lartë i Ministrisë së Jashtme.
