Flet gruaja e larguar nga puna: Erion Veliaj të mos manipulojë gjendjen e magazinës

Lidhja Demokratike e Gruas, ka dalë sot në mbështetje të Violeta Gecajt, e cila deri para pak kohësh ka qenë punonjëse e Bashkisë së Tiranës, si magaziniere në drejtorinë e Financës, por sipas pretendimeve të saj është pushuar padrejtësisht dhe madje është dhunuar nga Erion Veliaj.
Në një prononcim për mediat, ka qenë edhe vetë zonja Gecaj që ka sqaruar ngjarjen e denoncuar publikisht prej saj, edhe pse nënvizoi se ende nuk ka bërë padi.
“I shkova për ti kërkuar të vinte dorë në zemër dhe të më ndihmonte, por ai nuk e bëri. Degradoi në një dhunë fizike të paparë, ndërkohë që unë i kërkova ndihmë, ai më goditi dhe më përzuri nga zyra. Kjo është e tmerrshme për një grua, që të shkosh në shtëpi e dhunuar nga eprori yt, të cilit shumë gra i kanë dhënë votën, e kemi besuar se ai mund të na mbështesë dhe të na ndihmojë”, tha Geca në manifestimin e protestës që u bë në hyrjen e Bashkisë.
“Unë i kërkova të drejtën time pse isha pushuar nga puna në mënyrë të padrejtë. Ai më tha ‘drejtoju SHQUP-it, drejtoju Lulit, gjykatës, ata të zgjidhin’. Unë nuk kam mundësi tjetër për të ardhura, jam me qira, kryefamiljare dhe nuk kam të ardhura. Nga kjo bashki zhduku sepse nuk ke më punë këtu, më tha Veliaj”, u shpreh më tej Geca.
Por, gruaja e larguar nga puna shpreh edhe një tjetër shqetësim, manipulimin e gjendjes s ëmaklazinës.
“Tani shpreh shqetësimin dhe merakun e thellë  për magazinën, sepse gjendja mund të manipulohet, kërkoj korrektësi dhe praninë time gjatë inventarit që të mos manipulohet dhe të shfrytëzohet si rast që të më ndjekin penalisht. Nesër  do të më paraqesin arsyen e largimit nga Bashkia dhe pastaj do të vazhdoj me procedurat sipas ligjit”, tha Geca.
Ndërkohë, Reilza Bozdo, anëtare e Këshillit Bashkiak të Tiranës i ka bërë thirrje Veliajt “të zbardhi dhe të qartësojë raportin e tij në këtë situatë”.
Sipas saj, rasti që denoncon zonja Geca është skandaloz.
Kryetarja e LDGSH, deputetja Albana Vokshi i kërkoi Prokurorit të Përgjithshëm të nisë hetimin penal për Kryetarin e Bashkisë së Tiranës Erion Veliaj, i denoncuar për dhunën e ushtruar ndaj punonjëses së tij.