Presidenti Nishani shpreh ngushëllimet për rënien në krye të detyrës të komandantit të FNSH-së në Shkodër, Simon Gjeta
“Të dashur anëtarë të familjes Gjeta!
Lajmi i rëndë për ndarjen e parakohshme dhe tragjike nga jeta të komandantit të FNSH-së në Shkodër, duke rënë në krye të detyrës, është tejet i rëndë jo vetëm për ju, por edhe për të gjithë shqiptarët.
Në këto momente të dhimbshme, më lejoni që në emrin tim dhe të familjes sime si dhe të mbarë qytetarëve shqiptarë, t’ju përcjell ngushëllimet më të sinqerta për humbjen e pazëvendësueshme të bashkëshortit dhe babait të dashur, Simonit tuaj të shtrenjtë.
Në cilësinë e Kreut të Shtetit duke dënuar ashpërsisht aktin gjakatar, u bëj thirrje Policisë së Shtetit dhe organeve ligjzbatuese që të punojnë pareshtur pavarësisht nga ngjarja e rëndë dhe tronditëse, në luftën e tyre të përditshme kundër krimit.
Prehu në paqe të përjetshme Komandant Simoni!
Bujar Nishani”, shprehet Presidenti i republikës në mesazhin e tij për familjarët e komandantit të vrarë të FNSH-së së Shkodrës.
Edhe Kryeministri Edi Rama i shprehu ngushëllimet familjes së dëshmorit
Nëpërmjet një mesazhi, Kryeministri Edi Rama u shpreh ngushëllimet më të ndjera nënës, vëllezërve dhe motrës, të dëshmorit të Policisë së Shtetit Simon Gjeta, rënë mbrëmë në fushën e luftës me krimin.
“Arritjet e Policisë së Shtetit janë vepër e shqiptarëve të mirë si Simon Gjeta, emri i të cilit deri dje i panjohur mes mijëra të tjerëve nën uniformën blu, sot i bashkohet atyre që dhanë jetën në krye të detyrës”, thuhet në ngushëllimin e kreut të qeverisë, i cili në mesazh shprehet se, përulet përpara veprës dhe luftës pa kompromis ndaj krimit të efektivit Simon Gjeta.
Nishani dhe Rama ngushëllojnë familjarët e komandantit të vrarë të FNSH-së
