Elbasan Arena, shefi i sigurisë së UEFA, Keni Skot inspektoi stadiumin

Shefi i sigurisë së UEFA-s Keni Skot inspektoi ambientet e stadiumit Elbasan Arena i shoqëruar edhe nga ekspertë shqiptarë të FSHF dhe zyrtarë të tjerë.

Inspektimi erdhi pas rritjes së masave të sigurisë për ndeshjen që konsiderohet ndër më delikatet në aspketin e mbarëvajtjes pas ndërprerjes së ndeshjes së mëparshme në Beograd.

Ken Skot ka zhvilluar edhe dje paradite një takim në Federatën Shqiptare të Futbollit ku mori pjesë edhe ambasadori i republikës serbe në Tiranë, Miroljub Zariç dhe përfaqësues të Federatës Serbe të Futbollit, zëvendësdrejtori i përgjithshëm i policisë Altin Qato, sekretari i përgjithshëm i Ministrisë së Arsimit dhe Sportit, Plarent Ndreca dhe përfaqësues të organizmave që kanë lidhje me zhvillimin e ndeshjes. Në qendër të vëmendjes, së këtij takimi, ishin masat që do të merren në mënyrë që gjithçka në këtë ndeshje të shkojë sa më mirë. Sekretari i përgjithshëm i Federatës Shqiptare të Futbollit Ilir Shulku, që ishte edhe mikpritësi i takimit, pas përfundimit të tij, deklaroi për faqen zyrtare të FSHF: “Ishte një takim informues, në vazhdën e konsultave dhe takimeve që kemi zhvilluar gjatë gjithë kësaj periudhe, për organizimin sa më të mirë të kësaj ndeshjeje. Të gjithë të pranishmit, informuan në lidhje me masat që duhet të marrin në mënyrë që gjithçka të shkojë sa më mirë”.

Siguria më 8 tetor në Elbasan Arena është në duart e Keni Skot. Bëhet fjalë për një prej zyrtarëve më të lart të UEFA-s, që shërben në rolin e Oficerit të Sigurisë për institucionin e Mishel Platini. Britaniku është i përfshirë në mënyrë të drejtpërdrejtë në ndeshjen ndërmjet Shqipërisë dhe Serbisë. Madje, prej ngjarjeve të një viti më parë, kur sfida në Beograd u ndërpre mes dhunës dhe racizimit ndaj lojtarëve kuqezi. Keni Skot ishte zyrtari i lart i UEFA-s që bëri të pamundurën për vazhdimin e sfidës së 14 tetorit, duke anashkaluar thirrjet anti-shqiptare, incidentet dhe brutalitetin nga huliganët serbë.

/DRONI.al/