Moti i keq ka përfshiu mbrëmjen e kësaj të shtune edhe Vlorën. Reshjet e dendura që zgjatën për disa minuta shkaktuan sërish probleme në rrugë ku lartësia e ujit arriti në rreth 40 centimetra.
Një situatë e tillë, e ka futur edhe Vlorën, në hartën e qyteteve, që përmbytjen kanë filluar ta kthejnë në traditë, pas çdo reshje shiu.
Zona të tëra janë gjendur të përmbytura si zona e Skelës, lagjet “Pavarësia”, “Isa Boletini”, “1 Maji”, “24 Maji”, “28 Nëntori” etj. Kalimi i këmbësore përgjatë mbrëmjes së të shtunës ishte i pamundur dhe i vështirë edhe për automjetet.
Për minuta me radhë qarkullimi ishte mjaft i vështirë, ndërsa situata paraqitet problematike në të gjithë qytetin pasi niveli i ujit është rritur ndjeshëm.
Ndërkohë si pasojë e reshjeve të dendura është përmbytur kati i parë i bibliotekës “Shefqet Musaraj”, si dhe makina e parkingje nëntokësore. Po ashtu bëhet me dije se dhe Pediatria është përmbytur si pasojë e reshjeve të shiut.
Problemet më të mëdha janë regjistruar edhe në periferi si pasojë e mungesës së infrastrukturës.
Shkak i këtyre përmbytjeve veç sasisë së madhe të shiut janë edhe kanalizimet tërësisht të bllokuara.
Në gjithë rrethin e Vlorës ka pasur dhe vijon të ketë ndërprerje të energjisë elektrike në disa zona.
FOTO/ Vlorë, përmbytjet kthehen në “traditë”, nën ujë edhe biblioteka e spitali
