Fier, arrestohet Anxhelino Çervanaku, tentoi një vrasje në 2014, kërcënoi tre javë më parë djalin e një biznesmeni

Policia e Fierit ka arrestuar një 22-vjeçar, i cili ishte shpallur në kërkim për “vrasje me dashje në tentativë” dhe “armëmbajtje pa leje”. Burime zyrtare të drejtorisë së Policisë së Qarkut të Fierit, bënë të ditur se Anxhelino Çervanaku dyshohet se ka tentuar të vrasë me armë zjarri shtetasin B. M., në datën 02. 07. 2014 në fshatin Frakull e Madhe, pas një grindje për motive të dobëta.
“Nga Specialistët për Krimet e Rënda në Drejtorinë e Policisë së Qarkut Fier në bashkëpunim me shërbimet e Drejtorisë Policisë së Qarkut Tiranë, u bë ndalimi i shtetasit të shpallur në kërkim, Anxhelino Çervanaku, 22 vjeç,banues në fshatin Frakull e Madhe, Fier. Ndalimi i tij u bë pasi Gjykata e Shkallës Parë Fier ka caktuar masën e sigurisë ‘Arrest me burg’ ndaj këtij shtetasi për veprat penale ‘Vrasje me dashje’ e mbetur në tentativë dhe ‘Armëmbajtje pa leje’ parashikuar nga Nenet 76,22,278/4 të Kodit Penal. Shtetasi Anxhelino Çervanaku dyshohet se ka tentuar të vrasë me armë zjarri më datën 02. 07. 2014 në fshatin Frakull e Madhe,shtetasin B. M., pas një grindje për motive të dobëta që ka pasur me të”, thuhet në njoftimin e policisë.
Ndërkohë, disa ditë më parë, në 21 shtator 2015, Anxhelino Çervanaku, dyshohet se ka kërcënuar djalin e një biznesmeni karburantesh. Ngjarja ka ndodhur në Tiranë, në rrugën “Mine Peza”. Sipas policisë, djali i biznesmenit Iljas Fisheku, 23 vjeçari Andi Fisheku është kërcënuar me armë nga Dejvis Rustemaj dhe Anxhelino Çervanaku, të cilët u shpallën më pas në kërkim nga policia.
Dy të kërkuarit i prenë rrugën 23 vjeçarit i cili ndodhej i vetëm dhe duke e kërcënuar me armë në kokë i kanë kërkuar atij shumën e 1 mij eurove që ai u kishte marrë borxh pak kohë më parë. Më pas, sipas deklaratës që Fisheku ka bërë në polici, mësohet se autorët e ngjarjes e kanë kërcënuar atë se nëse nuk do të dorëzojë shumën prej 1 mijë euro brenda kësaj jave, ai do të vrite. Pas kësaj, dy personat e armatosur janë larguar prej andej me një makinë, ndërsa vetë 23 vjeçari, Andi Fisheku bëri denoncim në policinë e Tiranës. Ai deklaroi në polici se i njihte dy personat që e kishin kërcënuar, si dhe kishte treguar emrat e tyre.