Ndërsa Shqipëria ende është në fazën e statusit të vendit kandidat në BE, disa propozime për ndryshime në Kushtetutë e trajtojnë atë si anëtare të Bashkimit Europian.
Ndryshimet duken qesharake dhe e vendosin Kushtetutën në një pozitë absurde me nene që artikulohen për Shqipërinë anëtare të BE-së, të paktën 10 vjet para se ajo të jetë anëtare.
Amendimet janë propozuar nga komisioni i reformës në drejtësi drejtuar nga Fatmir Xhafaj dhe shoqëruar me ekspertizë të mbështetur nga fondacioni Soros në Tiranë.
Këto amendime parashikohen të kalohen në Parlament jo pas 4-5 vitesh por brenda pak muajsh.
Ekspertët e opozitës mendojnë ose të hiqen fare ose të grumbullohen në një kre të vecantë të Kushtetutës të shoqëruara me dispozita transitore që përcaktojnë kohën e zbatimit të tyre.
Megjithatë në vijim janë disa formulime të redaktuara edhe nga opozita për nenet 2, 7, 8, 11 dhe 13, të ndryshimeve në Kushtetutë:
“Shtetasit shqiptarë përfaqësohen drejtpërdrejt në Parlamentin Evropian, nëpërmjet përfaqësuesve të zgjedhur prej tyre sipas procedurave të rregulluara me ligj”.
“Këshilli i Ministrave i raporton Kuvendit për projektvendimet dhe projektrregulloret, me miratimin e të cilave ai merr pjesë në institucionet e Bashkimit Evropian. Në këto raste, Kuvendi mund të nxjerrë rezoluta, të cilat shërbejnë si bazë për veprimet e Këshillit të Ministrave në institucionet e Bashkimit Evropian”.
