Zv/ministri i Jashtëm, Selim Belortaja, deklaroi në Komisionin parlamentar të Punëve të Jashtme, se një nga arsyet që shtynë shqiptarët të kërkojnë azil në Gjermani janë edhe reformat e ndërmarra nga Qeveria Rama.
Belortaja, që vjen nga rradhët e LSI-së, u kujdes të nënvizonte se ky ishte një qëndrim i tij personal dhe jo i dikasterit që ishte thirrur të përfaqësonte.
Kjo pasi – siç i rikujtuan edhe demokratët – Kryeministri i Qeverisë në të cilën bën pjesë, ka deklaruar më parë se azilantët shqiptarë në Gjermani ishin emigrantë që jetonin më parë në Greqi dhe Itali.
Opozita në Komisionin e Jashtëm citoi raportimet e medias gjermane, që i cilësonte shqiptarët atje si azilantë ekonomik të motivuar politikisht. Për shkak edhe të një periudhe të gjatë që qëndronte në heshtje, Dokle i lejoi vetes të dalë disi nga tema, për të thënë se nuk ishte pjesë e politikës që pasurohet në tangon e korrupsionit.
Ndërsa përsa i përket refugjatëve nga vendet e Afrikës që mund të tranzitojnë përmes Shqipërisë, zv/ministri Belortaja informoi se kjo rrezikon të ndodhë më shumë gjatë dimrit. Ai theksoi se Qeveria ka marrë masat duke u parapërgatitur e ngritur disa qendra pritëse kryesisht në jug e në lindje të vendit.abcneës
