Është vetëvarur në degën e ullirit një 35-vjeçar nga Berati. Babai i dy fëmijëve, Fatbardh Salla, u gjet i pajetë nga gruaja dhe vëllezërit e tij, pak orë pasi ishte larguar nga shtëpia.
Sipas dëshmisë që kanë dhënë më vonë në polici familjarët e Sallës, 35-vjeçari kishte gjetur mundësinë kur në shtëpi nuk ka pasur njeri dhe ka realizuar aktin ekstrem. Ai kishte marrë një litar në banesë dhe me të në dorë është larguar në drejtim të tokave të familjes të mbjella me ullinj. Familjarët, kur kanë parë se ai ishte vonuar, kanë filluar ta kërkojnë, duke e gjetur në mes të ullishtës, të pajetë. Menjëherë ata e kanë marrë dhe e kanë transportuar për në spitalin e Beratit, por mjekët aty kanë konfirmuar se 35-vjeçari nuk kishte asnjë shenjë jete.
Nga ana e familjarëve nuk pohohet që më herët babai i dy fëmijëve të ketë pasur probleme të shëndetit mendor.
E vetmja dëshmi e tyre për grupin hetimor ka qenë se, prej disa ditësh, Fatbardh Salla kishte shfaqur shenja të mërzitjes, por pa reaguar se për çfarë arsyesh ishte në këtë gjendje.
Polica ka marrë në pyetje familjarët e viktimës, të cilët të tronditur kanë thënë se nuk e kishin menduar se mund ndodhte një gjë e tillë e rëndë. Viktima ishte fermer dhe nuk kishte pasur probleme për të cilat të kishte dijeni familja e tij. Paraprakisht kanë nisur hetimet për ngjarjen, duke e cilësuar ngjarjen si vetëvrasje në kushtet e depresionit me anë të mbytjes me litare.
