Çdo kush që ka të drejtë të lëshojë kuponin tatimor dhe nuk e jep atë do të mbajë përgjegjësi administrative dhe në rast përsëritje do të ketë ndëshkim penal. Pas shqetësimit të ngritur në Komisionin e Ligjeve, nga deputetët socialist dhe të Lëvizjes Socialiste për Integrim një ditë më parë, se neni 13 i Kodit Penal i ndryshuar, ishte i paqartë në pikën se kush do të mbante përgjegjësi, administratori apo punonjësi, qeveria solli një tjetër formulim që parashikon të penalizim të personit që ka detyrimin e lëshimit të kuponit tatimor.
“Ushtrimi i një aktiviteti tregtar të paligjshëm ose të paregjistruar në organet tatimore , moslëshimi i kuponit tatimor, dëftesës ose faturës tatimore, nga personi i cili ka detyrimin të lëshojë kuponin tatimor në momentin e transaksionit, kur më parë është dhënë masë administrative, përbën vepër penale dhe dënohet deri në tre vjet burgim”, ndryshohet neni 13.
Ndonëse opozita kërkoi që mosdhënia e kuponit të mbetet kundërvajtje qeveria theksoi se nuk ka ndërmend të përkrah informalitetin.
Ndërkohë sipas ndryshimeve të fundit të pritshme në Kodin Penal,parashikohet gjithashtu se importimi, eksportimi apo tranzitimi i paligjshëm i mallrave të ndaluar ose të kufizuara që hyjnë e dalin në Republikën e Shqipërisë, i kryer me çdo mënyrë a mjet qoftë, dënohen me burgim deri në dhjetë vjet. Kontrabanda për mallrat e akcizës dënohet me 7 deri 10 vite burg . Tregtimi i mallrave kontrabandë dënohet nga 3 deri në 10 vjet burg.
Kush nuk lëshon kupon tatimor, gjobë për herë të parë, burg herën e dytë
