Një rrugë e qytetit të Bronxit, e mbushur përplot më fëmijë me maska dhe veshjet karakteristike të Halloween, është kthyer në një skenë të vërtetë horrori të shtunën pasdite, kur një makinë “kaloi” mbi një grup fëmijësh dhe prindërit e tyre të moshave të ndryshme, thotë sot shtypi njujorkez.
Media e Nju Jorkut, thotë se të vdekur janë tre persona, duke përfshirë fatkeqësisht edhe një djalë shqiptarë 24-vjeçar, dhe të plagosur tre persona përfshirë edhe një 21 vjeçare shqiptare Greta Leka.
Kristian Leka, 24 vjeçar, humbi jetën për të shpëtuar motrën e tij të vogël Fiona, 10 vjeç teksa u godit nga makina fatalist dhe u deklarua i vdekur nga mjekët gjatë rrugës për tu transportuar në spitalin Jacobi.
Kristiani, shkruan shtypi u përpoq të shtyjë motrën e tij, për sigurinë e saj, thanë dëshmitarët dhe të afërmit e tij.
“Makina doli shumë shpejt nga rruga dhe ai e shtyu të motrën duke ia shpëtuar jetën asaj”, tha xhaxhai tij, Lush Leka, 64 vjeç për gazetën “Daily News”, në spital.
Motra e vogël Fiona Leka 10 vjeçe, pësoi nga ky incident një krah të thyer, tha Lushi dhe duket jashtë rrezikut për jetën
Zyrtarët e policisë nga NYPD, thonë se incidenti ndodhi, dje pasdite rreth orës 04:50,gjatë festimeve të Halloween në një lagje të Bronxit – Morris Park (një nga lagjet më të populluara me shqiptarë në qytetin e Bronxit) dhe, sipas tyre, tre persona kanë vdekur dhe tre të tjerë u plagosën.
Personat të cilët mbeten të vdekur nga ky aksident fatal sipas raportit të policisë janë një burrë 65-vjeçar, një djalë i ri 24-vjeçar dhe një vajzë 10-vjeçare.
Të plagosurit përfshijnë një vajzë 3-vjeçare, një vajzë 9-vjeçare dhe një grua 21-vjeçare.
Ata u transportuan në Jacobi Medical Center me lëndime, që nuk ishin të rrezikshme për jetën.
Dëshmitarët, thonë sipas shtypit lokal se makina e tipit Dodge, që shkaktoi aksidentin drejtohej nga një shofer 57 -vjeçar, i quajtur Howard Unger.
Policia tha se po heton rrethanat dhe shkaqet e aksidentit. Ende nuk është qartë nëse shoferi ka pësuar ndonjë goditje në zemër në këtë incident apo ka pasur ndonjë problem mendor.
(“Bota Sot”)
