Referuar disa fotove “autoreklamuese” që Edi Rama ka zgjedhur të shpërndajë në rrjetet sociale, Nisma #Thurje zbulon se njëra prej këtyre fotove, është një vetëdenoncim për njërin prej bizneseve të vegjël tregtimi peshku (nën 20 milionë lekë të vjetra xhiro vjetore), dhe që pronarit të saj Meço Dulaj mund ti kushtojë 15 milionë lekë (të vjetra) gjobë.
Ironia vetëdenoncues në këtë foto qëndron edhe te fakti se ndërsa pronari Meço Dulaj, “i gëzohet” uljes së taksave nga 450 mijë lekë (të vjetra) në vitin 2013, në 0 (zero) lekë në vitin 2016, ndërsa mësohet, referuar edhe të dhënave të QKR, se ky biznes, është regjistruar këtë vit…, që do të thotë se nuk ka qenë “i shtrënguar” të paguajë “taksa të larta”, dy vjet më parë…, për arsyen e thjeshtë se nuk ka pasur biznes…
“Këshilla miqësore në “Facebook” e Nisma #Thurje, për Meço Dulaj
“Dëgjo se s’kemi gjë me z. Meço, po dëgjuam në televizor që kishte qenë i dashuruar me shikim të parë me aksionin anti-informalitet.
Po pyetja qe ne kemi është:
Ku e dinte Meçoja sesa ishin taksat ne 2013, sepse ai e ka hapur biznesin në 2015, siç thotë edhe QKR-ja?
Dhe tjetra, z. Meço nga një vështrim kështu përciptas që i hodhëm ne ambienteve, si pasojë e masave ligjore të aksionit, lumturia jote është vënë në rrezik, pasi:
Tek ambienti nuk ke të afishuar tabelën e listës se çmimeve. 500.000 leke të reja gjobë.
Nuk ke të afishuar tabelën ku shkruhet ‘Klientë, ju lutemi tërhiqni kuponin tatimor’. 500.000 lekë të reja gjobë.
Nuk ke të afishuar tabelën ku shkruhet ‘Klienti ka të drejtë të ike pa paguar, në se nuk i jepet kuponi tatimor’. 500.000 leke të reja gjobë.
Gjithsej 1.5 milionë lekë të reja gjobë.
Kështu që vërtet ti Meço mund të kishe rënë në dashuri me shikim të parë me aksionin, por që po ta shohësh mirë e kupton që ka nevoje për një shikim të dyte… se 1.5 milionë lekë gjoba i meriton kështu me një shikim të shpejtë që i bëmë ne dyqanit tënd nga fotografia.
Dhe ti që e ke qarkullimin gjithsej 2 milionë në vite, e kupton çdo të thotë 1.5 milionë lekë vetëm gjoba.
Dhe kij parasysh, vetëm nga fotografia të gjetëm kaq, mendo të vijnë jeniçerët e tatimeve t’i hyjnë siç dinë ata…
Dhe pastaj do ta kuptosh që ai 25.000 lekshi që ke shpëtuar është ‘bakshish’.
Kështu që leje dashurinë dhe hajde të Hënën në protestë në orën 12, te Kryeministria.
Se po s’folëm të gjithë, ajo që shumë shpejt do të të mbetet nga gjithë biznesi yt, do të jetë kjo foto që të ka nxjerrë Kryeministri si reklamë…”.
