DENONCIM & DOKUMENTE/ Rama për dy javë, 60 miliardë lekë “dhuratë” klientëve të tij

PD ka vijuar denoncimin sot me tenderat, që sipas saj, Edi Rama vazhdon tu japë klientëve të vetë.
Në emër të PD-së, me emra e dokumente, anëtarja e Këshillit Kombëtar të PD-së, koordinatorja Ina Zhupa, denoncoi abuzimin prej rreth 60 miliardë lekë (të vjetra), të përfituara me tendera, prej klientëve të kryeministrit.
“Në dy javët e fundit, skema e Edi Ramës e ndarjes së parave me miqtë dhe donatorët e tij ka qenë në funksion me kapacitet të plotë.
Siç tregon buletini i prokurimeve;
Ilir Beqa me firmën e tij Intech plus, ka marrë tendera të tjerë, me vlerë 1 miliardë e 640 milionë lekë.
Në një prej tenderave në Ministrinë e jashtme, me 320 milionë lekë, kompania e Beqës ka qenë ofertues i vetëm dhe ka marrë qindarkë me qindarkë gjithë fondin limit të vënë në dispozicion.
Vazhdon Vilma Nushi me firmën e saj Trimed, duke marrë këto dy javë 710 milionë lekë nga Beqa dhe nga spitalet e vendit. Kryesisht, para të marrë me negociim, pa shpallje.
Godet sërish Sadri Abazi, me firmën që me letra e ka nipi i tij, duke future në dorë 1 miliardë e 830 milionë lekë në tendera të ndryshëm nga rrugët tek KESH-i.
Omega Farma, pronari i së cilës është në arrest dhe nën hetim për korrupsion, vazhdon të marrë para nga Ilir Beqa.
Ministri i Ramës kërkon të blejë heshtjen e shefit të Omega Farmës, pasi njihet përfshirja e tij në skemën e recetave fiktive. 1 miliardë e 279 milionë lekë për Nadirin e Beqës.
Ndërtuesi i Ramës, Papuli ka marrë edhe ai një pako këto dy javë, me shërbim e shitje makine, 80 milionë lekë.
Shihni pra të nderuar qytetarë se çfarë bëhet me paratë tuaja.
Ato janë që në fillim të destinuara të ndahen mes Ramës e miqve të tij, mes Beqës e klientëve të tij.
Ky shtet i korruptuar duhet ndalur. Ky është viti i fundit i kësaj hajdutërie që po pasuron Ramën e 40 hajdutët e tij, e po varfëron deri në frymën e fundit popullin.
Koha është tani. Korrupsionin do ta ndalim ne të bashkuar, në rrugë në sheshe, derisa ta dëbojmë klikën që vjedh e zhvat paratë e pasuritë e shqiptarëve”, denoncoi Ina Zhupa.