LETRA/Saimir Tahiri hyn në polemikë me dy gazetat e mëdha europiane

Ministri i Punëve të Brendshme Saimi Tahiri i ka nisur sot të njëjtën letër dy prej mediave më të mëdha europiane “Corriere Della Sera” në Itali dhe “Daily Mirror” në Britani pas publikimit të lajmit se Shqipëria është e përfshirë në trafik armësh dhe droge për terroristët e ISIS

“Jam i bindur që nuk jam i vetmi shqiptar që ndihet keq nga të pavërtetat që u pasqyruan, siç besoj se çdo italian apo qytetar i çdo vendi të botës që ka pasur mundësinë të njohë sadopak Shqipërinë, është ndier keq nga pasqyrimi thelbësisht i shtrembëruar i realitetit shqiptar në reportazhin tuaj.

Në këtë rast, të pavërtetat e raportuara prej jush për Shqipërinë, duke shpikur shkolla për militantët e ISIS apo mbi 1000 rekrutë të paguar e të gatshëm për luftë, janë një tullë më shumë në murin e mosbesimit që na bën gjithmonë e më të paaftë për të fituar kohën që kemi humbur duke parë si kërcënim njëri-tjetrin, e kësisoj, të paaftë për të fituar kundër kërcënimit terrorist”, shkruan ndër të tjera ministri Tahiri.

“Ndaj, i nderuar, më lejoni t’ju siguroj se shqiptarët krenohen me vlerat e çmuara të tolerancës dhe bashkëjetesës fetare, një shembull unik që veç krenarisë, ka rrënjosur tek çdo qytetar shqiptar vullnetin për të mos pranuar frikën dhe kërcënimin e terrorit, por kurajën e forcën për të ndërtuar bashkëpunimin me çdo shoqëri të lirë që luftën kundër terrorizmit e fiton më së pari me vlera e besim, pastaj me armë”, shkruan Tahiri.

Corriere Della Sera në një reportazh të disa ditëve më parë, shkruante se nga Shkodra trafikoheshin armë fillimisht drejt Malit të Zi, e më tej me destinacion grupet mafioze, ku nuk përjashtohej përfundimi i tyre në duart e esktremistëve të ISIS që kryejnë sulme terroriste në Evropë.

Daily Mirror në një shkrim të sajin theksonte se pas operacionit të policisë në vitin 2014 që shënoi ndërhyrjen e parë të shtetit kundër kultivimit të kanabisit në Lazarat, parcelat e drogës janë në pushtetin e ISIS që e trafikon atë në vendet e Evropës.

Ministri Tahiri deklaroi gjithashtu për gazetarët e Tiranës se shkrimet janë nga gazetarë anonim, ndërsa e vlerësoi përmbajten e këtyre lajmeve si “spekulime mediatike”. Ai tha se Shqipëria ka pasur një numër procedimesh lidhur me çështjet e armëve dhe po ashtu me kultivimin e lëndëve narkotike. Por asnjëra nga këto nuk lidhet me çështjet e terrorizmit.

/DRONI.al/