Në analizën vjetore të KLSH-së, ishte pjesmarrws edhe kreu i Shtetit Bujar Nishani i cili vlerësoi maksimalisht punën e Kontrollit të Lartë të Shtetit, duke thënë se ky është ndër institucionet më të besueshme.
“Jemi këtu pas celebrimit të 90 vjetorit të këtij institucioni, meritoi çdo gjë që u tha e u bë. Vlerësoj punën e bërë nga KLSH. Keni shansin të jepni kontributin personal, profesional dhe njerëzor. Shtetin do ta bëjmë ne, me kontribut të përditshëm. Nuk them që keni arritur performancën më të shkëlqyer, por keni arritur standardin më të përparuar, institucion që ngritët në një shkallë të lartë besimin. Besimi nuk është i lehtë të arrihet. Jemi ne individët, institucionet dhe shoqëria që duhet ta arrijë”.
Ndër të tjera, Presidenti inkurajoi KLSH-në të mos frenohet me rastet e kallëzimit në administratë, pasi edhe nëse ekzistojnë, kjo nuk do të thotë se është i inkriminuar gjithë shteti, por se përgjegjësitë në këtë rast janë individuale.
“Kjo nuk do të thotë se kemi administratë tërësisht të korruptuar, ju mos u frenoni nga perceptimet njerëzore. Përgjegjësia është individuale e cilitdo që shfrytëzon postin e abuzon. Kjo të mos ju frenojë. Administrata ka njerëz profesionistë, nga ana tjetër goditja e fenomenit të korrupsionit dhe paligjshmërisë nuk mund të kriminalizojë gjithë shtetin tonë. Inkurajoj frenimin e perceptimeve të gabuara. Të mos quhet i inkriminuar gjithë shteti”.
“Inkurajoj kryetarin e të gjithë drejtuesit e tjerë të institucioneve, por edhe institucionet që ju monitoroni krahas bashkëpunimit me secilin punonjës, të injektojë vlerësimin kurajën, mbështetjen, mbrojtjen. Sa më shumë t’i komplikojmë gjërat, komplikojmë veprimtarinë e shoqërisë dhe shtetit, sa më shumë t’i bëjmë të thjeshta, aq më shumë lehtësojmë punën dhe identifikojmë përgjegjësinë që ka individi. Prandaj do ti drejtohesha të gjithë institucioneve të marrin përgjegjësitë. Nuk jemi të përjetshëm në poste e institucione”, tha më tej Nishani
Presidenti Nishani theksoi se “potencialet janë shumë herë më të mëdha se sa pikëpyetjet që kemi përpara. Nuk ka përse këto pikëpyetje të mos zgjidhen në rrugën e duhur dhe në efikasitetin e duhur”.
Kreu i shtetit garantoi KLSH-në për mbështetjen e plotë të institucionit të presidentit. “Dëshiroj të shoh vijimin e këtij dinamizmi që keni zoti kryetar.”- tha Nishani.
