Një infermiere e kujdesit paliativ, pas shumë vitesh punë, ka shkruar një libër ku tregon përvojën e saj me të sëmurët.
Në librin me titull “Pesë gjëra që mbeten peng kur je duke vdekur”, Bronnie Ware shkruan se të gjithë pacientët e saj në momentet e fundit të jetës ishin më të shqetësuar për natyrën e marrëdhënieve që kishin ndërtuar me njerëzit sesa për paratë, famën apo suksesin.
“Do të doja ta kisha jetuar jetën siç e doja vetë, jo siç prisnin të tjerët ta bëja”
Ky është ndoshta pengu më i madh i pacientëve me sëmundje që përfundojnë në vdekje. Ata thonë se do të donin t’u kishin kushtuar më shumë kohë njerëzve të dashur, në vend që të bënin disa prej gjërave që kanë bërë. Ata janë shprehur se nuk kishin realizuar as gjysmën e ëndrrave të tyre dhe kjo për shkak të zgjedhjeve që kishin bërë.
“Do të doja të kisha punuar më pak”
Çdo pacient mashkull e kishte këtë peng. Ata kanë thënë se kanë shpenzuar pak kohë me familjet e tyre dhe si pasojë kishin humbur rritjen e fëmijëve dhe momentet e kaluara me prindërit.
“Do të doja t’i kisha shprehur ato që ndieja”
Shumë pacientë janë shprehur se i kishin ndrydhur ato që ndienin, për të qenë në paqe me të tjerët. Madje, infermierja shprehet se ky fakt mund ketë ndikuar në shfaqjen e sëmundjes.
“Do të doja të kisha qëndruar më i lidhur me miqtë”
Është e vështirë të mbash lidhjet me miqtë e vjetër ndërsa vitet ecin dhe për këtë arsye shpesh ndodh që lidhje të forta shoqërore të dobësohen. Pacientët në prag të vdekjes janë shprehur se nuk e kishin kuptuar këtë gjë deri në momentin që ishte tepër vonë, kur ata kishin humbur kontaktet me miqtë e vjetër.
“Do të doja ta kisha lënë veten të isha i lumtur”
Shumë prej pacientëve nuk e kishin kuptuar se lumturia është një zgjedhje. Frika e ndryshimit, dëshira për t’i kënaqur të tjerët dhe zakonet e përditshme i kanë penguar ata të ndihen të lumtur.
“Kur je në shtratin e vdekjes, ajo që të tjerët mendojnë për ty nuk ka më asnjë rëndësi. Jeta është zgjedhje. Zgjidh në mënyrë të ndërgjegjshme, zgjidh në mënyrë të zgjuar dhe të ndershme. Zgjidh të jesh i lumtur”, shkruan ajo.
