Gazetari i Top Channel Muhamed Veliu humbi sot gjyqin me një portal lajmesh në Tiranë lidhur me akuzën që ai kishte bërë për dëm moral shkaktuar gazetarit.
Në një njoftim të gazetarit thuhet se gjyqtari mbajti anën e lapsi.al duke rrëzuar një vendim të mëhershëm të kolegjeve të bashkuara të Gjykatës së Lartë.
“Gjyqtari Ibrahim Hoxha nëpërmjet një vendimi skandaloz sot ligjëroi shpifjen. Gjyqtari Ibrahim Hoxha në një vendim haptazi të padrejtë u përpoq të arsyetonte se padia ime për shpifje ndaj portalit Lapsi.al me botues Andi Bushatin dhe Armand Shkullakun, rrëzohet për shkak se nuk përmbushen kushtet ligjore për shkaktimin e dëmit. Sipas arsyetimit të cunguar të gjykatës thëniet e publikuara nuk përbëjnë as fyerje dhe as shpifje të ndonje lloji”, shkruan Veliu në Facebook.
“Për më tepër gjyqtari anashkalon haptas vendimin unifikues nr. 12 të Kolegjeve të Bashkuara të Gjykatës së Lartë, duke vendosur arbitrarisht të mos e zbatojë në këte rast, një vendim që ka forcën e ligjit. Gjyqtari në vendim pretendon se nuk u provua ardhja e dëmit moral, ndërkohë që nuk i kërkon në asnjë moment palës së paditur Lapsi.al me botues Armand Shkullakun dhe Andi Bushatin të provojë vërtetësinë e atyre cfare kanë publikuar, që në fakt është thelbi i këtij gjykimi”, – vijon më tej gazetari.
Duke i hyrë më në themel çështjes, Veliu thekson se “Gjatë 6 seancave të hetimit gjyqësor pala e paditur nuk paraqiti një provë të vetme ku të mbështeste pretendimin se “unë gjithnjë marr pyetje të gatëshme nga zyra e shefit të qeverisë. Përballë një vendimi skandaloz në vazhdën e vendimeve që mbajnë firmën e këti gjyqtari do të vijoj të kërkoj drejtësi në Gjykatën e Apelit”.
