RAPORTI/ Në burgjet e paraburgimet shqiptarë, celularë e “punishte” pijesh alkoolike

Prezenca e celularëve në burgjet e paraburgimet, vazhdon të mbetet ende shqetësim edhe për vitin 2015.
Një raport i Drejtorisë së përgjithshme të Burgjeve, e sheh si shqetësim në rritje këtë fenomen për vitin që shkoi, krahasuar me pararendësin.
Sipas këtij raporti, mësohet se gjatë vitit 2015 janë kapur 1205 celularë kundrejt 1123 në vitin 2014. Në pjesën më të madhe (1090), celularët u janë kapur të dënuarve dhe vetëm në 115 raste, familjarëve të tyre.
Në këtë kontekst nuk kanë munguar edhe raste e bllokimit të kartave të telefonit apo karikuesve.
Vendin e parë për celularë të bllokuar për vitin 2015 e mban burgu i Lezhës.
Sipas raportit të Drejtorisë së përgjithshme të Burgjeve, një fenomen “interesant” është tentativa e të dënuarve për të shndërruar vendet  vuajtjes së dënimit edhe në “punishte” të prodhimit artizanal të pijeve alkoolike.
Dëshmi për këtë janë raste e shumta të bllokimit të bërsive nëpër burgjet dhe paraburgimet.
Për vitin 2015, mësohet se ka pasur 792 raste bllokimi bërsish gjatë kontrolleve në vendet e vuajtjes së dënimit. Kjo shifër mbart një “zbulim të madh” për sa i përket burgut që ruan vendin  e parë, “absolut” në këtë “fushë të konkurrimit”. Ai është vendi i vuajtjes së dënimit i njohur si “mine Peza” në Tiranë i cili ka regjistruar 650 raste bllokimi bërsish, më se 80 për qind të të gjithë rasteve të zbuluara e bllokuara në rang vendi.
I njëjti raport gjithashtu, bënë të ditur se gjatë vitit 2015, janë kapur edhe bimë narkotike, mjete prerëse, etj.
Sipas raportit, institucionet të cilat kanë qenë më problematike sa i përket sendeve të ndaluara janë IEVP, Jordan Misja, Lezhë, Rrogozhinë, Durrës, Peqin, Fier, Korçë, Lushnjë etj.

/DRONI.al/