Presidenti Bujar Nishani vizitoi sot nga afër vendin ku po kryhen ndërtimet e këndit të lojërave te Parku i Liqenit. Ai u shpreh se ajo që po i bëhet parkut të liqenit është vandalizëm.
‘Jam për tu solidarizuar me këtë lëvizje qytetare, të këtyre djemve dhe vajzave të shkolluara dhe mendje hapur. Por kur vjen këtu reagimi I parë është i trishtë. Ky vandalizëm që po i bëhet parkut të Liqenit të Tiranës.
Tu prishësh fëmijëve dhe qytetarëve të Tiranës pronën e vetme të çlodhjes është vandalizëm me të cilën nuk pajtohen askush”, u shpreh Presidenti.
Ndërsa për akuzat e kryebashkiakut të Tiranës, Presidenti Nishani tha se gjuha e përdorur nga ai është prej rrugaçi dhe se askush nuk duhet të bëhet pjesë e këtyre sulmeve verbale.
“Nuk është hera e parë që sulme me fjalor prej rrugaçësh adresohen. Nuk është normale
Akuzat vijnë nga njerëz që nuk e njohin shtetin, nuk kanë kontribuar asnjë minutë të vetëm për shqiptarët por kanë marrë ndaj saj.
Lëvizja këtu te Parku i Liqenit është lëvizje për emancipim. Ti lëmë ata që shantazhojnë qytetarët e Tiranës, ti lëmë në botën e tyre të banalitetit. Ne kemi zgjedhur model tjetër atë të të qenit civil.
Spekulanti recidivist akuzon Presidentin për vilë në mes të parkut. Rezidenca presidenciale nuk është brenda parkut, së dyti nuk është e Bujar Nishanit por e popullit shqiptar por këta që kanë kulturën e makutit dhe me kulturën e makutërisë e konsiderojnë se pronë e shtetit është personale. Prandaj jo vetëm unë por dhe ju që po rezistoni mos u bëni pre e kësaj dhune verbale.
Prej kohësh Tirana është kthyer në një qytet i pabanueshëm. Dhe lulet u zëvendësuan nga betoni. Oksigjeni është zëvendësuar nga pluhuri i karbonit. Çdo individ që adreson sulme me fjalor rrugaçërie merr atë që meriton. Çdo ofendim dhe fyerje që i adresohet presidentit i adresohet cdo qytetari shqiptar. Kryetari i bashkisë duhet të vijë e të takojë këta djem e vajza. Të respektojë standardet dhe normat e civilizimit dhe qytetarisë. Të zbatojë dhe respektojë ligjin”, u shpreh Kreu i Shtetit.
Presidenca informon se kjo është në përgjigje të ftesës së anëtarëve të grupimit qytetar.
Ndërtimi i parkut u bë shkak i përplasjes së institucionit të Presidencës me Bashkinë e Tiranës.
Presidenti Nishani zhvilloi paraditen e djeshme një takim me një grup të shoqërisë civile që kundërshtojnë projektin.
Nishani: Vandalizëm te Parku i Liqenit, akuzat me fjalor rrugaçësh nga persona që nuk njohin shtetin
